TOShKENT, 10-iyul — Sputnik. Shu yilning 1-iyul holatiga O‘zbekistonda nogironligi bo‘lgan shaxslar umumiy aholining 2,7 foizini tashkil etadi. Bu haqda AOKAda o‘tkazilgan brifingda Ijtimoiy himoya milliy agentligi axborot xizmati rahbari Dilfuzabegim Ro‘zmetova ma’lum qildi.
2025 yil 1-iyul holatiga ko‘ra, mamlakatda 1 million 50 ming 218 nafar nogironligi bo‘lgan shaxs yashaydi. Bu umumiy aholining 2,7 foizini tashkil etadi.
Ulardan:
174 373 nafar — 18 yoshgacha bo‘lgan bolalar,
96 067 nafar — I guruh,
707 909 nafar — II guruh,
71 869 nafar — III guruh nogironligi bo‘lgan shaxslardir.
“Nogironlikni baholash shkalasi asosida shaxslarning kundalik hayotdagi faolligi va ishtirokini (yani funksionalligini) baholashning yangi tartibi joriy etildi. Xususan, ushbu baholash tizimi asosida 32 036 nafar shaxs baholandi, natijalar “Yagona milliy ijtimoiy himoya” axborot tizimiga kiritildi”, — deyiladi xabarda.
Aytilishicha, ijtimoiy himoya milliy agentligi tomonidan 60 dan ortiq normativ-huquqiy hujjat loyihasi ishlab chiqilgan bo‘lib, ulardan 18 tasi nogironligi bo‘lgan shaxslarni qo‘llab-quvvatlashga qaratilgan.