TOShKENT, 3-iyul — Sputnik. O‘zbekiston prezidenti Shavkat Mirziyoyev Belarus prezidenti Aleksandr Lukashenkoga mamlakatning Mustaqillik kuni munosabati bilan tabrik yo‘lladi. Bu haqda Belarus prezidenti matbuot xizmati ma’lum qildi.
O‘zbekiston prezidenti Shavkat Mirziyoyev Aleksandr Lukashenkoga yo‘llagan tabrigida keyingi yillarda O‘zbekiston-Belarus munosabatlarida misli ko‘rilmagan yuksak darajaga erishilganini alohida ta’kidladi.
“O‘zaro manfaatli hamkorlik barcha yo‘nalishlarda jadal rivojlanmoqda, iqtisodiy kooperatsiya va madaniy-gumanitar almashinuv bo‘yicha muhim dasturlar amalga oshirilmoqda. Ishonchim komil, bo‘lajak uchrashuvlarimiz O‘zbekiston bilan Belarus o‘rtasidagi ko‘p qirrali sheriklikni yanada kengaytirish uchun yangi imkoniyatlar ochadi”, — deyiladi bayram tabrigida.
Prezident qayd etishicha, hozirda Aleksandr Lukashenkoning samarali rahbarligida Belarusda keng ko‘lamli yangilanishlar strategiyasi muvaffaqiyatli amalga oshirilmoqda, mamlakatning barqaror ijtimoiy-iqtisodiy taraqqiyoti ta’minlanmoqda, aholi farovonligi yuksalmoqda.
“Yaqinda Minskda bo‘lganimda bunga yana bir bor amin bo‘ldim” — dedi Shavkat Mirziyoyev.
Shuningdek, bayram munosabati bilan prezident va Belarus xalqi nomiga Rossiya, Qozog‘iston, Tojikiston, Qozog‘iston, Turkmaniston, Qirg‘iziston, Ozarbayjon prezidentlari, shuningdek Xitoy, Turkiya, Hindiston, Pokiston, Shimoliy Koreya kabi mamlakatlarning yetakchilaridan qutlovlar kelgan.