TOShKENT, 2-iyul — Sputnik. Boku sudi Sputnik Ozarbayjon tahririyati rahbari Igor Kartavix va bosh muharriri Yevgeniy Belousovni to‘rt oyga hibsga oldi. Bu haqda RIA Novosti mahalliy OAVga tayangan holda xabar berdi.
"Sud Sputnik Ozarbayjon axborot agentligi ofisida politsiya tomonidan o‘tkazilgan operatsiya natijasida qo‘lga olingan Igor Kartavix va uning xodimi Yevgeniy Belousovga nisbatan qamoqqa olish ehtiyot chorasini tanladi”, — deya xabar beradi "Report" agentligi.
Jurnalistlarga "Firibgarlik," "Noqonuniy tadbirkorlik" va "Jinoiy yo‘l bilan orttirilgan mulkni qonuniylashtirish" kabi uchta modda bo‘yicha ayblov e’lon qilingan.
Rossiya TIV rasmiy vakili Mariya Zaxarovaning qayd etishicha, Rossiya va Ozarbayjon uchun do‘stlik munosabatlari nihoyatda muhim va uni buzmoqchi bo‘lganlar nima qilayotganini yaxshilab o‘ylab ko‘rishi kerak.
Uning aytishicha, Bokuning Sputnik Ozarbayjonga nisbatan choralari hozirda ularning ishiga da’volar bilan emas, balki boshqa mulohazalar bilan belgilangan. Shuningdek, Zaxarova Ozarbayjon elchisining Rossiya tashqi ishlar vazirligiga chaqiruvini izohlar ekan, bu "shunchaki qog‘oz yoki bir-ikki jumla topshirish emas, balki suhbat bo‘lganini" ta’kidladi.