TOShKENT, 26-iyun — Sputnik. O‘zbekiston va Yevroosiyo iqtisodiy ittifoqi (YeOII) o‘rtasida erkin savdo zonasini tashkil etish to‘g‘risidagi bitim loyihasi hozircha ko‘rib chiqilmoqda. Bu haqda O‘zbekiston hukumatining Yevroosiyo iqtisodiy komissiyasi (YeIK)dagi vakili va O‘zbekistonning Rossiyadagi elchixonasi maslahatchisi Fanil Qodirov Sputnik O‘zbekiston muxbiriga ma’lum qildi.
Minskdagi Yevroosiyo iqtisodiy forumi doirasida Fanil Qodirov bitim allaqachon YeIKga kiritilgani va Ittifoqqa a’zo mamlakatlarga yuborilganini ma’lum qildi.
"O‘ylaymanki, ushbu kelishuv loyihasi aynan bizda qolgan texnik, tarif va notarif to‘siqlarni olib tashlashga qaratilgan", — deydi Qodirov.
Uning so‘zlariga ko‘ra, O‘zbekiston erkin savdo zonasini yaratishga tayyor va tez orada kelishuv qabul qilinishiga umid qilmoqda.
Uning ta’kidlashicha, O‘zbekiston qonunchilikni YeOII va JST bazasiga muvofiq unifikatsiya qilish rejalarini belgilagan. O‘zbekiston hech qanday qarama-qarshilikni ko‘rmayapti, chunki YeOII va JSTning normativ-huquqiy asoslari o‘xshash.
Ma’lumot uchun, bugun Minsk xalqaro ko‘rgazmalar markazida IV Yevroosiyo iqtisodiy forumi rasman ochildi. Tadbirning asosiy mavzusi - "Yevrosiyo iqtisodiy integratsiyasi strategiyasi: natijalar va istiqbollar." Forum Oliy Yevroosiyo iqtisodiy kengashi (YeOII davlatlari rahbarlari sammiti) yig‘ilishiga bag‘ishlangan.
Ochilish marosimida Belarus bosh vaziri, Yevroosiyo hukumatlararo kengashi raisi Aleksandr Turchin va Yevroosiyo iqtisodiy komissiyasi hay’ati raisi Bakitjan Sagintayev ishtirok etdi.