TOShKENT, 26 apr — Sputnik. Rossiya prezidenti Vladimir Putin va AQSh prezidentining maxsus vakili Stiv Uitkoff kecha, 25-aprel kuni Kremlda muzokara o‘tkazdi, deb xabar bermoqda RIA Novosti.
Muzokaralarda Rossiya prezidenti yordamchisi Yuriy Ushakov va Rossiya to‘g‘ridan-to‘g‘ri investitsiyalar jamg‘armasi rahbari Kirill Dmitriyev ishtirok etdi.
Vladimir Putin va Oq uy rahbarining maxsus vakili Rossiya va AQSh o‘rtasida to‘g‘ridan-to‘g‘ri aviaqatnovlarni qayta tiklash masalasini muhokama qilishmadi, dedi Rossiya prezidenti matbuot kotibi Dmitriy Peskov RIA Novostiga.
“Yo‘q”, - dedi suhbatdosh tegishli savolga javob berib.
Ushakovga ko‘ra, uchrashuv uch soat davom etdi hamda konstruktiv va foydali xarakterga ega bo‘ldi. Tomonlar Rossiya va Ukraina vakillari o‘rtasida to‘g‘ridan-to‘g‘ri muzokaralarni qayta tiklash imkoniyatlarini muhokama qildilar.
Bundan tashqari, muzokaralar nafaqat mojaroni hal qilish, balki boshqa xalqaro masalalar bo‘yicha ham Moskva va Vashington pozitsiyalarini yanada yaqinlashtirish imkonini berdi. Rossiya va AQSh muloqotni davom ettiradi, deya qo‘shimcha qildi prezident yordamchisi.