TOShKENT, 12-mart — Sputnik. Rossiya Federatsiyasi hukumati raisining birinchi o‘rinbosari Denis Manturov O‘zbekiston bosh vaziri o‘rinbosari Jamshid Xodjayev bilan uchrashdi, deya xabar berdi Rossiya hukumati matbuot xizmati.
Uchrashuvda iqtisodiy hamkorlik bo‘yicha Rossiya-O‘zbekiston hukumatlararo komissiyasi hamraislari ikki tomonlama hamkorlikning ustuvor masalalarini muhokama qildi.
“Dastlabki hisob-kitoblarga ko‘ra, o‘tgan yil yakuniga ko‘ra o‘zaro tovar ayirboshlash hajmi 5,2 foizga oshib, 10 milliard dollardan oshdi. Shu bilan birga, Rossiya eksporti ham, O‘zbekistondan importi ham o‘sdi”, — dedi Denis Manturov.
Jamshid Xodjayevning so‘zlariga ko‘ra, O‘zbekiston o‘zaro tovar ayirboshlash dinamikasiga yanada optimistik baho berib, uning o‘sishini 11,7 milliard dollarga yetkazmoqda.
Denis Manturov mamlakatlar o‘rtasidagi savdo-iqtisodiy va sarmoyaviy aloqalarni yanada kengaytirish nuqtayi nazaridan hududlararo hamkorlik uchun salmoqli salohiyat mavjudligini ta’kidladi.
Uchrashuvda quyidagilar ma’lum qilindi:
O‘tgan yil davomida Rossiya viloyatlari rahbarlarining O‘zbekistonga 39 ta tashrifi amalga oshirildi.
Turizm sohasida ham ijobiy dinamika kuzatilmoqda – o‘tgan yil yakunlariga ko‘ra, rossiyaliklarning O‘zbekistonga sayyohatlari soni 515 mingtaga yetgan.
O‘zbekistonda Rossiya oliy o‘quv yurtlarining 14 ta filiali faoliyat ko‘rsatmoqda – bu Markaziy Osiyo davlatlari orasida rekord ko‘rsatkich.
Butunrossiya tashqi savdo akademiyasining yana bir filiali tashkil etilmoqda.