TOShKENT, 11 mar — Sputnik. O‘zbekiston prezidenti Shavkat Mirziyoyev telefon orqali muloqotda Birlashgan Arab Amirliklari prezidenti Shayx Muhammad bin Zoid Ol Nahayonni tavallud kuni bilan samimiy tabrikladi, deya xabar berdi davlat rahbari matbuot xizmati.
“Mamlakatimiz yetakchisi BAA prezidentiga mustahkam sog‘lik va farovonlik, davlatchilik faoliyatida katta muvaffaqiyatlar, do‘st Amirliklar xalqiga tinchlik-osoyishtalik va ravnaq tiladi. Davlat rahbarlari butun musulmon ummati uchun muqaddas bo‘lgan Ramazon oyi munosabati bilan ham bir-birlarini samimiy qutladilar”, — deyiladi xabarda.
Qayd etilishicha, ikki mamlakat o‘rtasida savdo-iqtisodiy va investitsiyaviy sohalar rivojlanib, tovar ayirboshlash va investitsiyalar hajmi, qo‘shma korxonalar soni izchil ortib bormoqda.
“Bugungi kunda 20 milliard dollarlik loyihalar portfeli doirasida Amirliklarning yetakchi kompaniyalari bilan "yashil" energetika, raqamlashtirish, sun’iy intellekt, shaharsozlik va infratuzilma, turizm, xususiy biznes kabi muhim yo‘nalishlarda faol hamkorlik qilinmoqda”, — deya qayd etilgan xabarda.
Yetakchilar Samarqandda "Markaziy Osiyo - Ko‘rfaz arab davlatlari hamkorlik kengashi" muloqotining ikkinchi sammitini o‘tkazish masalalarini ham ko‘rib chiqishdi.