TOShKENT, 3-mart — Sputnik. Rossiyada Osiyo-Sibir" ulgurji-saralash savdo bozori ochildi, deya xabar berdi O‘simliklar karantini va himoyasi agentligi matbuot xizmati.
Novosibirskda ochilgan "Osiyo-Sibir" ulgurji-saralash savdo majmuasining umumiy maydoni salkam 130 ming kv. metrga teng. U yerda O‘zbekistonda yetishtirilgan qishloq xo‘jaligi mahsulotlarining ulgurji savdosi amalga oshiriladi.
Majmua hududida quyidagi obyektlar qurilgan:
oziq-ovqat bozori;
meva-sabzavot kichik ulgurji savdo shoxobchalari;
go‘sht va sut mahsulotlarini saqlash;
qishloq xo‘jaligi mahsulotlarini qabul qilish va qayta ishlash;
ulgurji yuk avtomashinalari uchun to‘xtash joylari.
"Markaziy Osiyoning boshqa davlatlari, shuningdek, Eron va Xitoydan yetkazib beruvchilar bilan ham hamkorlik qilishga tayyormiz. Savdo markazida tadbirkorlar va xaridorlar uchun yaratilgan barcha sharoitlar jahon talab va standartlariga javob beradi", – dedi "Osiyo-Sibir" ulgurji savdo markazi direktori Muzaffar Rahimov “Dunyo” AAga.
Yaqin kelajakda majmuada mehmonxonalar, avtomobillar to‘xtash joylari, issiqxonalar barpo etilishi ko‘zda tutilgan.
Agentlikka ko‘ra, ma’lum muddat avval mazkur ulgurji-saralash savdo markazi maydoni bir necha barobar kichik bo‘lib, qarovsiz ahvolda bo‘lgan. O‘tgan yilning may oyida Karantin agentligi direkori Ibrohim Ergashevning Rossiya Federatsiyasiga mehnat safari davomida ulgurji-chakana savdo markazi o‘rganilib, o‘zbekistonlik eksportorlar va importorlar uchun munosib sharoit yaratishga kelishilgan.