TOShKENT, 1 mar – Sputnik. AQSh prezidenti Donald Tramp Vladimir Zelenskiy bilan bahsdan so‘ng razvedka ma’lumotlarini Ukraina Qurolli kuchlari bilan bo‘lishishni taqiqlashi mumkin, deb yozadi “New York Times” amerikalik amaldorga tayanib.
“Oval kabinetdagi spektakldan so‘ng <...> prezident (Tramp – tahr.) hatto harbiy mablag‘larning boshqa turlarini, razvedka ma’lumotlarini taqdim etishni, ukrainalik harbiylar va uchuvchilarni tayyorlashni, shuningdek, Amerikaning Germaniyadagi harbiy bazasida xalqaro yordam masalalari bilan shug‘ullanuvchi chaqiruv markazini joylashtirishni o‘z ichiga olgan bilvosita yordamni ham to‘xtatishga qaror qilishi mumkin”, — deyiladi xabarda.
“Washington Post” nashrining yozishicha, Tramp ma’muriyati Kiyevga barcha harbiy yordamni yetkazib berishni to‘xtatish masalasini ko‘rib chiqmoqda.
Tramp va Zelenskiy janjali
Juma kuni Donald Tramp va Vladimir Zelenskiy Oq uyda uchrashdi. Ular nodir yer metallari bo‘yicha kelishuv imzolashlari kutilgan edi, biroq uchrashuv oxirida ular o‘rtasida janjal boshlanib ketdi. “Fox News” xabariga ko‘ra, mojarodan so‘ng Amerika yetakchisi Zelenskiyni Oq uydan haydab yuborgan, resurslar bo‘yicha kelishuv esa barbod bo‘lgan.
Uchrashuvdan so‘ng Tramp Zelenskiy tinchlikka tayyor emasligini va AQShga hurmatsizlik ko‘rsatganini ta’kidladi.
“CBS News”ning Amerika yetakchisiga yaqin bo‘lgan yuqori martabali manbalarga tayanib xabar berishicha, Oq uyda sodir bo‘lgan voqealar Ukrainaga keyingi yordamni to‘xtatish masalasini ko‘tarmoqda.
OAV xabarlariga ko‘ra, bahsdan so‘ng Ukraina rasmiylari Oq uyni kelishuvni muhokama qilishga qaytarishga astoydil harakat qilgan, ammo Tramp Zelenskiy bilan gaplashishni istamagani uchun hech qanday natija bo‘lmagan.