TOShKENT, 6 yanv — Sputnik. Rossiyaning “MISiS” Fan va texnologiya universitetining Olmaliq shahridagi filiali "Elektr energetikasi va elektrotexnika" yo‘nalishi bo‘yicha ta’lim berish uchun litsenziya oldi. Bu haqda Energetika vazirligi matbuot xizmati xabar berdi.
“O‘zbekistonda yana bir universitet filialida xalqaro darajadagi energetiklar tayyorlanishi boshlanadi. "MISIS" universitetining Olmaliq filiali "Elektr energetikasi va elektrotexnika" yo‘nalishi bo‘yicha ta’lim berish uchun litsenziya oldi. Litsenziya olish jarayoni bir yildan ortiq vaqt talab etadi va bir qator vazifalarni o‘z ichiga oladi: kampusda sharoit yaratishdan tortib, professor-o‘qituvchilar tarkibini tayyorlashgacha”, — deyiladi xabarda.
Talabalar qabuli 2025-yildan boshlanadi. Filial negizida magistrlik dasturlarini o‘z ichiga olgan Ilg‘or muhandislik maktabi (IMM) ham tashkil etiladi.
Filial 2018-yildan beri faoliyat yuritib kelmoqda va allaqachon konchilik, metallurgiya va avtomatlashtirish sohasida mutaxassislar tayyorlamoqda.