TOShKENT, 18 dek — Sputnik. O‘zbekiston va Fujayra Amirligi ishbilarmon doiralari o‘rtasidagi aloqalarni jadallashtirishga kelishildi, deya xabar berdi "Dunyo" AA.
O‘zbekiston elchisi Abdulaziz Aqqulov Fujayra Savdo-sanoat Palatasi raisi shayx Said bin Surur ol Sharqiy bilan uchrashdi. Unda respublika va Fujayra Amirligi ishbilarmon doiralari o‘rtasidagi aloqalarni yanada rivojlantirish masalasi ko‘rib chiqildi.
“Uchrashuvda Amirliklar tomonidan Fujayra shahrining iqtisodiy ko‘rsatkichlari, rivojlangan (drayver) tarmoqlari, yirik sanoat korxonalari, port va erkin iqtisodiy zonalari to‘g‘risida ma’lumot taqdim etildi va O‘zbekiston hamda Fujayra tadbirkorlar subyektlari o‘rtasida aloqalarni yaqinlashtirishga qiziqish bildirildi”, — deyiladi xabarda.
Shuningdek, O‘zbekistonda yirik korxonalar va tijorat banklaridagi davlat aktivlarini xususiylashtirish jarayoni to‘g‘risidagi taqdimotlar o‘tkazildi.
“O‘zbekiston hududlari va Fujayra o‘rtasida aviaqatnovlarni tashkil etish muhokama qilinib, bu turistlar oqimi va o‘zaro savdo imkoniyatlarini kengaytirishiga xizmat qilishi qayd etildi”, — deya qo‘shimcha qilindi xabarda.
Uchrashuvda Fujayra erkin iqtisodiy zonalari imkoniyatlari ham o‘rganildi. Undan O‘zbekiston tadbirkorlarining ombor va shourum sifatida foydalanish imkoniyatlari muhokama qilindi.
Aytilishicha, 2025-yil I yarim yilligi davomida shayx Said ol Sharqiyni O‘zbekistonga tashrifini amalga oshirilishi hamda ishbilarmon doiralar ishtirokida biznes forum o‘tkazish rejalashtirilgan.