TOShKENT, 1 dek — Sputnik. "Turon" maktab teatri Turkiyada "Ruhlar isoni" asari asosida sahnalashtirilgan spektakl namoyish etdi, deya xabar berdi teatr matbuot xizmati.
Ta’lim sayohati doirasida “Turon maktab teatri” tanlovining respublika bosqichi g‘oliblari, Navoiy viloyatining Navoiy shahar 11-sonli ayrim fanlar chuqur o‘rganiladigan ixtisoslashtirilgan maktab o‘quvchilari Istanbul shahrida Erkin Vohidovning “Ruhlar isoni” spektaklini namoyish etdi.
Maktabning Ibrat jamoasi a’zolari “Turksoy” xalqaro tashkiloti tomonidan e’tirof etildi va tashakkurnoma bilan taqdirlandi. Mazkur spektakl va ta’lim dasturi “Turksoy” xalqaro tashkiloti hamda Turkiya Milliy ta’lim vazirligi bilan hamkorlikda tashkil etildi.
Tadbir davomida O‘zbekiston bosh konsuli va Turkiya Ta’lim vazirligining Istanbul shahar boshqarmasi boshlig‘i o‘rinbosari Bulent Alash o‘rtasida uchrashuv o‘tkazildi. Muzokaralarda ikki davlat o‘rtasida ta’lim sohasidagi hamkorlikni kengaytirish, shu jumladan, Istanbul shahrida o‘zbek maktabini tashkil etish tashabbusi muhokama qilindi.