TOShKENT, 28 noya — Sputnik. Yil oxirigacha Yevroosiyo iqtisodiy ittifoqi (YeOII) mamlakatlarida ishbilarmonlik faolligining ijobiy tendensiyasi davom etadi. Bu haqda Yevroosiyo iqtisodiy komissiyasi (YeIK) matbuot xizmati xabar berdi.
“Mos keluvchi va yetakchi ko‘rsatkichlarning yangilangan hisob-kitobiga ko‘ra, yil oxirigacha Yevroosiyo iqtisodiy ittifoqining barcha mamlakatlarida iqtisodiy faollikning ijobiy dinamikasi davom etadi”, — deyiladi xabarda.
Ittifoqning aksariyat mamlakatlarida ilgari belgilangan tendensiyalar saqlanmoqda: Armaniston va Qozog‘istonda ishbilarmonlik faolligining o‘sishi tezlashishi kutilmoqda, Belarus va Rossiyada esa o‘sish sekinlashadi.
Qirg‘iziston qisqa muddatli sekinlashuvdan so‘ng tiklanish bosqichiga kirdi va o‘sishning yanada tezlashishi kutilmoqda.
Ma’lumot uchun, O‘zbekistonda ishbilarmonlik faolligi indeksining mo‘’tadil kamayishi kuzatilgan. Iqtisodiy tadqiqotlar va islohotlar markazi tomonidan baholangan Ishbilarmonlik faolligi indeksi O‘zbekistonda 2024-yil sentabr oyida 958 birlikni tashkil etib, avgust oyiga nisbatan -4,2 foizga va o‘tgan yilning mos davriga nisbatan -5,3 foizga kamayish qayd etilgan. Qoraqalpog‘iston Respublikasi (48,2%), Navoiy (38,0%), Toshkent (37,9%), Samarqand (37,7%) va Qashqadaryo (36,9%) viloyatlarida sezilarli darajada o‘sish kuzatilgan. Shu bilan birga, ushbu indeks 5 ta hududda kamaygan bo‘lib, bunda Sirdaryo (-15,0%) viloyatida eng ko‘p pasayishi kuzatilgan.
Ishbilarmonlik faolligi xo‘jalik yurituvchi subyektlar faoliyati samaradorligini aniqlaydi. Ishbilarmonlik faolligi ma’lum bir sanoat turining holatini yoki iqtisodiyotning holatini aks ettirish va vaziyatni baholashga xizmat qiladigan iqtisodiyotda ishlatiladigan maxsus ko‘rsatkich.
Makroiqtisodiyotda hududlar iqtisodiy holatini baholash uchun ishbilarmonlik faolligi indekslaridan foydalaniladi. Ishbilarmonlik faolligi indekslari qimmatli qog‘ozlar bozori ishtirokchilari uchun ham muhim.