Toshkent shahridagi Fotosuratlar uyi yana bir ijodkorning betakror dunyosiga eshik ochdi. O‘zbekiston Badiiy ijodkorlar uyushmasining haqiqiy a’zosi, "Mehnat shuhrati" ordeni sohibi va "O‘zbekistonda xizmat ko‘rsatgan san’at arbobi" unvoni sohibi Ataxan Allabergenovning "Ro‘yo" nomli shaxsiy ko‘rgazmasiga bag‘ishlangan tadbir bo‘lib o‘tdi. Bu ko‘rgazma nafaqat san’at ixlosmandlari, balki O‘zbekistonning tabiiy go‘zalliklarini qayta kashf etmoqchi bo‘lganlar uchun ham juda katta ahamiyatga ega.
Ko‘rgazma doirasida rassomning 100 taga yaqin asari, jumladan, rangtasvir, akvarel va teatr dekoratsiyalarining ijodiy namunasi namoyish etildi.
Ataxan Allabergenov umrining katta qismini Xorazm viloyatidagi Ogahiy nomidagi musiqali komediya teatrida ijod qilishga bag‘ishlagan. U yerda ishlab, ko‘plab sahna asarlarini bezash bilan birga teatr jamoasi hurmatiga va tomoshabinlar olqishiga sazovor bo‘lgan.
Rassomning asarlarida O‘zbekistonning turli burchaklari - qadimiy va sirli Xiva, Urganch, serquyosh Surxondaryo va Qashqadaryo hamda Farg‘ona vodiysining tabiiy manzaralari aks etgan. Uning ranglar bilan ishlash mahorati tomoshabinni o‘ziga rom etadi. Har bir asarda ranglar jonlanadi, tabiat yoki tarixga muhabbat ilhomlantirgan alohida bir mohiyat seziladi.
Ataxan Allabergenov nafaqat rangtasvir olamida, balki teatr sahnalarida ham buyuk iz qoldirgan. Uning sahnaviy dekoratsiyalari, rangtasvir asarlari jonli va jozibali bo‘lib, teatr tomoshabinlarining qalbiga chuqur ta’sir ko‘rsatgan.
Rassom haqida qisqacha:
1947 yil - Turkmanistonning Toshhovuz viloyatida tug‘ilgan.
1965-1968 yillar - Toshkent davlat pedagogika institutida tahsil olgan.
1975-1999 yillar - Xorazmdagi Ogahiy nomidagi teatrda bosh rassom sifatida ishlagan.
1981 yil - O‘zbekistonda xizmat ko‘rsatgan san’at arbobi unvoniga sazovor bo‘lgan.
2000 yil - "Mehnat shuhrati" ordeni bilan taqdirlangan.
2021 yil - vafot etgan.
Ataxan Allabergenovning san’ati - bu orzu, mehnat va badiiy izlanishlarning o‘ziga xos uyg‘unligi. Uning ijodi nafaqat o‘ziga xos bo‘lib qolaveradi, balki kelajak avlodlar uchun ham ilhom manbai bo‘ladi.