TOShKENT, 17 noya — Sputnik. O‘zbekiston Qozog‘istonda bo‘lib o‘tadigan Yevroosiyo iqtisodiy ittifoqida (YeOII) intellektual mulkni himoya qilish bo‘yicha forumga taklif etildi, deb xabar bermoqda Yevroosiyo iqtisodiy komissiyasi (YeIK) matbuot xizmati.
Yevroosiyo iqtisodiy komissiyasi, Qozog‘iston Adliya vazirligi va Xalqaro kontrafaktga qarshi assotsiatsiya 5-6 dekabr kunlari Ostona shahrida kontrafaktga qarshi XII xalqaro forum o‘tkazadi.
Intellektual mulk huquqlarini himoya qilish va ta’minlashning dolzarb masalalariga bag‘ishlangan tadbir kontrafakt mahsulotlar tarqalishiga qarshi kurashda asosiy muammolarni muhokama qilish va samarali yechimlarni topish uchun maydonga aylanadi.
YeIK iqtisodiyot va moliya siyosati vaziri Baxit Sultonovning so‘zlariga ko‘ra, YeOII mamlakatlarida tashqi savdo faoliyati va qonuniy ishlab chiqarishni rivojlantirish uchun iqtisodiy rag‘batlantirish bilan "huquqni muhofaza qilish" vositalarining kombinatsiyasi kontrafakt va qalbakilashtirilgan mahsulotlarni bozordan siqib chiqarishga qaratilgan.
“Ishonchim komilki, kontrafaktga qarshi forum doirasida ushbu masalalar professional muhokama qilinadi, bu, shubhasiz, Yevroosiyo iqtisodiy ittifoqi bozorida kontrafakt mahsulotlarning aylanishiga qarshi kurash samaradorligini oshirishga hissa qo‘shadi”, — dedi u.
Aytilishicha, bu yil forum o‘zining geografik qamrovini kengaytirib, Hindiston, Eron, Xitoy, Tunis, Turkmaniston va O‘zbekistondan diplomatik korpus va kompaniyalar vakillarini taklif qilmoqda.
Forum dasturidan intellektual mulk sohasidagi yetakchi ekspertlar ishtirokidagi yalpi majlis, 10 ta muhokama sessiyasi joy olgan. Ular huquqiy tartibga solish, bojxona nazorati, iste’molchilar huquqlarini himoya qilish, elektron tijoratni rivojlantirish, shuningdek, intellektual mulk sohasida IT-texnologiyalaridan foydalanishga bag‘ishlanadi.
Ma’lum qilinishicha, 2019-2023 yillarda Yevroosiyo iqtisodiy ittifoqi mamlakatlarida intellektual mulk sohasida 46 mingdan ortiq huquqbuzarliklar aniqlangan va 60 million donadan ortiq kontrafakt tovarlar musodara qilingan.