TOShKENT, 28 okt — Sputnik. Dunyoda maymun chechagini yuqtirish holatlari rekord darajaga yetdi. Bu haqda Sog‘liqni saqlash vazirligi Jahon sog‘liqni saqlash tashkilotiga tayanib xabar berdi.
Tashkilotning so‘nggi hisobotiga ko‘ra, sentabr oyida dunyo bo‘yicha mpox (maymun chechagi) infeksiyasiga chalinish holatlari rekord darajaga yetgan.
Bu davrda 2763 ta yangi kasallanish holati ro‘yxatga olinib, avgust oyiga nisbatan 8 foiz o‘sish qayd etilgan. Aniqlangan bemorlarning asosiy qismi, ya’ni 1756 nafari Afrika mintaqasi aholisi hissasiga to‘g‘ri keladi.
O‘z navbatida, maymun chechagi virusidan o‘lim ko‘rsatkichlari ham ortmoqda. Afrika kasalliklarni nazorat qilish va oldini olish markazining ma’lum qilishicha, shu kungacha mpoxni yuqtirgan bemorlardan 1,1 ming nafari hayotdan ko‘z yumgan.
Shunga asoslanib, markaz “Afrikada ushbu infeksiya tarqalishi bilan bog‘liq epidemiologik vaziyat nazoratdan chiqmoqda” deb xulosa qildi.