TOShKENT, 23 okt — Sputnik. Rossiya va Xitoy o‘rtasidagi savdo hamkorligi og‘ir xalqaro vaziyatga qaramay faol rivojlanmoqda. Bu haqda XXR raisi Si Szinpin Qozondagi BRIKS sammitida rossiyalik hamkasbi Vladimir Putin bilan uchrashuvda aytdi, deb yozmoqda RIA Novosti.
“Murakkab va jiddiy tashqi vaziyatga qaramay, mamlakatlar o‘rtasida savdo va boshqa sohalardagi hamkorlik faol rivojlanmoqda va yirik qo‘shma loyihalarni amalga oshirish bo‘yicha ishlar izchil davom ettirilmoqda”, — dedi Si Szinpin.
Uning ta’kidlashicha, tomonlar ikki mamlakat iqtisodiyotining sifat jihatidan rivojlanishiga turtki berish va qo‘llab-quvvatlash maqsadida “Bir kamar, bir yo‘l” va YeOII tashabbuslarini integratsiyalashuviga ko‘maklashishda davom etishlari kerak.
Si Szinpinning aytishicha, BRIKS, ehtimol, rivojlanayotgan dunyo va rivojlanayotgan bozor mamlakatlarini birlashtirish uchun eng muhim hamkorlik platformalaridan biridir.
Rossiya va Xitoy o‘rtasidagi hamkorlik mamlakatlar o‘rtasidagi munosabatlar qanday yo‘lga qo‘yilishi kerakligining namunasidir, dedi Rossiya prezidenti Vladimir Putin.
Putin Rossiya-Xitoy munosabatlari har tomonlama sheriklik va strategik hamkorlik darajasiga ko‘tarilganini alohida ta’kidladi.
“Va biz to‘liq ishonch bilan aytishimiz mumkinki, ular zamonaviy dunyoda davlatlar o‘rtasidagi munosabatlar qanday yo‘lga qo‘yilishi kerakligining namunasiga aylandi”, — dedi Putin.
Eslatib o‘tamiz, BRIKS sammiti Qozon shahrida 22-24 oktabr kunlari bo‘lib o‘tadi.