TOShKENT, 21 okt — Sputnik. O‘zbekiston parlamenti saylovi bo‘yicha tashviqot kampaniyasi saylov qonunchiligi normalariga muvofiq, uyushqoqlikda va tinch o‘tmoqda. Bu haqda MDH kuzatuvchilari missiyasining dushanba kuni e’lon qilingan oraliq hisobotida ma’lum qilingan.
“Missiyaning fikricha, saylovoldi tashviqoti saylov qonunchiligi normalariga muvofiq, uyushqoqlik va tinch bilan o‘tmoqda”, — deyiladi MDH Ijroiya qo‘mitasi saytida e’lon qilingan hisobot matnida.
Hisobotda qayd etilishicha, siyosiy partiyalar va deputatlikka nomzodlarga adolatli, halol va raqobat asosida ovoz berish uchun teng sharoit va keng imkoniyatlar yaratilgan.
Missiyaning Toshkent shahridagi shtab-kvartirasi O‘zbekiston Markaziy saylov komissiyasi va huquqni muhofaza qiluvchi organlarga fuqarolardan saylov jarayonini buzish holatlari bilan bog‘liq murojaatlar kelib tushishi va ularni ko‘rib chiqish natijalari to‘g‘risida xabardor qilishni so‘rab murojaat qildi.
“Missiya O‘zbekiston Respublikasi Oliy Majlisi Qonunchilik palatasi deputatlari sayloviga tayyorgarlik ko‘rish va uni o‘tkazish bo‘yicha monitoring natijalari bo‘yicha yakuniy hujjatda o‘zining yakuniy xulosalari va baholarini bayon qiladi”, — deya qo‘shimcha qildi missiya.
Eslatib o‘tamiz, O‘zbekistonda navbatdagi parlament saylovi 27-oktabr kuni bo‘lib o‘tadi, saylovoldi tashviqoti 26-iyuldan boshlandi, nomzodlar 22-sentabrdan boshlab saylovoldi tashviqotini davom ettirmoqda. O‘zbekiston Markaziy saylov komissiyasidan ma’lum qilishlaricha, saylovda 1 mingdan ortiq xalqaro va xorijiy kuzatuvchilar ishtirok etishi rejalashtirilgan.
Missiya tarkibida 167 nafar kuzatuvchi akkreditatsiya qilingan. Missiya a’zolari uzoq muddatli kuzatuvlar davomida Andijon, Buxoro, Navoiy, Namangan, Samarqand, Sirdaryo, Toshkent, Farg‘ona, Xorazm viloyatlari hamda Toshkent shahridagi hududiy va uchastka saylov komissiyalari faoliyati bilan tanishdi.