TOShKENT, 17 okt — Sputnik. Yevroosiyo iqtisodiy komissiyasi (YeIK) hay’ati 2023-yilga mo‘ljallangan integratsiya jarayonlarining biznes sharoitlariga ta’siri monitoringi natijalari to‘g‘risidagi hisobotni ko‘rib chiqdi, deb xabar berdi YeIK matbuot xizmati.
Hujjat o‘tgan yil davomida Yevroosiyo integratsiyasining Yevroosiyo iqtisodiy ittifoqida (YeOII) biznes yuritish shartlariga ta’sirining barcha asosiy ko‘rsatkichlari bo‘yicha ijobiy dinamikani ko‘rsatadi.
Xususan, texnik jihatdan tartibga solish sohasida YeOIIning kuchga kirgan texnik reglamentlari soni 47 taga ko‘paydi, standartlar ro‘yxatlaridagi davlatlararo standartlarning ulushi 67 foizga yetdi.
O‘zaro tovar ayirboshlashning o‘sishi yo‘lidagi to‘siqlarni bartaraf etishda ham sezilarli yutuqlarga erishildi: 2023-yilda 10 ta to‘siq va 1 ta cheklov olib tashlandi. 2015-yildan boshlab YeIK qarorlari loyihalarining tartibga solish ta’sirini baholash bo‘yicha ijobiy xulosalar ulushi maksimal darajaga yetdi - 98%.
Bu Komissiya tomonidan tadbirkorlik faoliyatini amalga oshirish uchun sharoitlarni yaxshilashga qaratilgan qarorlarning umumiy yo‘nalishidan dalolat beradi.
“Hisobot Ittifoqdagi integratsiya jarayonlari real samaralar berayotgani, tadbirkorlik rivoji va aholi turmush darajasini oshirishga xizmat qilayotganini tasdiqlaydi. Biz YeOII xizmatlarning yagona bozorini yaratish sari ishonch bilan harakat qilayotganini ko‘rmoqdamiz – bugungi kunga kelib u 142 ta sektorni o‘z ichiga olgan. Bu biznes uchun yangi imkoniyatlar yaratadi va barcha ishtirokchi mamlakatlarning iqtisodiy o‘sishiga hissa qo‘shadi”, — dedi YeIK iqtisodiyot va moliya siyosati vaziri Baxit Sultonov.
YeOII davlatlari o‘rtasidagi o‘zaro tovar ayirboshlash hajmiga kelsak, u 2023-yilda 2022-yilga nisbatan 4,7 foizga oshgan. Shu bilan birga, shu davrda o‘zaro xizmatlar savdosi hajmi 22,3 foizga o‘sdi.
“Bu raqamlar, bir tomondan, YeOIIda yagona xizmatlar bozorini shakllantirish va kengaytirish talabidan dalolat beradi, boshqa tomondan esa – YeOII doirasidagi o‘zaro savdoni diversifikatsiya qilish dinamikasining tovarlar savdosiga nisbatan xizmatlar savdosi hajmi va ulushini oshirish bo‘yicha global tendensiyaga muvofiqligi haqida”, - deya tushuntirdi Sultonov.
Ijobiy dinamika mehnat migratsiyasi sohasida ham kuzatilmoqda, uning o‘sish sur’ati 2023-yilda 35 foizga oshdi. Umuman olganda, YeOIIda ro‘yxatga olingan ishsizlik darajasi rekord darajadagi eng past ko‘rsatkichga – 0,8 foizga yetdi.
Shuningdek, Ittifoqning aksariyat davlatlarida faoliyat yuritayotgan yuridik shaxslar va kichik korxonalar sonining barqaror o‘sish tendensiyasi kuzatilmoqda. YeOII davlatlari o‘rtasida to‘plangan to‘g‘ridan-to‘g‘ri investitsiyalar hajmining 11,2 foizga o‘sishi qayd etildi.