TOShKENT, 16 okt — Sputnik. Misr va O‘zbekiston muftiylari fatvolar ishlab chiqishda hamkorlik qiladi, deya xabar berdi O‘zbekiston musulmonlari idorasi matbuot xizmati.
O‘zbekiston musulmonlari idorasi raisi, muftiy Shayx Nuriddin Xoliqnazar va Misr Arab Respublikasi muftiysi doktor Nazir Muhammad Ayyod fatvo yo‘nalishida hamkorlik qilish masalalarini muhokama qilishdi.
“Misr va O‘zbekiston muftiylari fatvolar ishlab chiqishda hamkorlik qiladi”, — deyiladi xabarda.
Doktor Nazir Muhammad Ayyod o‘zaro aloqalar uzoq o‘tmishga borib taqalishini qayd etib, O‘zbekiston Misr uchun muhim ahamiyatga ega mamlakat ekanini ta’kidladi.
U O‘zbekistondagi o‘zgarishlarni doimo kuzatib borayotgani, Markaziy Osiyoda yagona bo‘lgan O‘zbekiston musulmonlari idorasi huzuridagi Fatvo markazi faoliyati katta ahamiyatga molik ekanini ta’kidladi.
“Kelgusida o‘zaro aloqalarni rivojlantirish va diniy soha xodimlari o‘rtasida malaka oshirish kurslarini tashkil etish borasida hamkorlik qilishga tayyorligini bildirdi”, — deyiladi xabarda.
Muloqotda ta’lim, ilmiy-tadqiqot, malaka oshirish va diniy-ma’rifiy sohalardagi hamkorliklar tobora rivojlanib borayotgani qayd etildi.