TOShKENT, 28 sen — Sputnik. Indoneziya Tashqi ishlar vazirligi tomonidan “Indoneziya – YeOII” raqamli texnologiyalar bo‘yicha muloqot tashkil etildi. Bu haqda Yevroosiyo iqtisodiy komissiyasi (YeIK) matbuot xizmati xabar berdi.
Muloqot doirasida YeIK Savdo siyosati departamenti Savdoni tartibga solishning maxsus masalalari bo‘limi boshlig‘i Kira Danilcheva Indoneziya, YeOII va unga a’zo davlatlar o‘rtasida erkin savdo kelishuvini tuzish istiqbollari to‘g‘risida ma’ruza qildi.
“Kelishuv mamlakatlarimiz bizneslari o‘rtasida telekommunikatsiyalar, innovatsiyalar, raqamli texnologiyalar va elektron tijorat sohalarida hamkorlik va kooperatsiya aloqalarini mustahkamlash mexanizmlarini belgilab beradi. Biz YeOIIga a’zo davlatlar va Indoneziya ishbilarmon doiralarining manfaatdor vakillarini kelgusidagi qo‘shma tashabbuslarda ishtirok etishga taklif qilamiz”, — dedi Kira Danilcheva.
Muloqot raqamli kompaniyalar o‘rtasida yechimlar, texnologiyalar, tajriba almashish va hamkorlikning yangi imkoniyatlarini o‘rganish uchun aloqalarni o‘rnatishga ko‘maklashishga qaratilgan. Tadbirda Indoneziya, Qozog‘iston, Qirg‘iziston va Rossiya kompaniyalari ham turli sohalarda, jumladan sog‘liqni saqlash, moliya, kiberxavfsizlik, turizm, logistika va boshqa sohalarda o‘zlarining raqamli xizmatlari va mahsulotlarini taqdim etishdi.