TOShKENT, 16 sen — Sputnik. Rossiya Federatsiyasi madaniyat vaziri Olga Lyubimova MDH Madaniy hamkorlik kengashining XXXIX majlisida MDH davlatlarining katta yoshlar birlashgan xorini yaratishni taklif qildi.
Sankt-Peterburgda MDHga a’zo davlatlar Madaniy hamkorlik kengashining navbatdagi XXXIX majlisi bo‘lib o‘tdi. Kengash majlisida davlatlar o‘rtasidagi hamkorlik istiqbollari va mintaqaviy hamkorlikni mustahkamlash masalalari muhokama qilindi.
“MDHga a’zo davlatlarning Katta yoshlar qo‘shma xorini yaratish va uning birinchi konsertini 2025-yil 9-mayda, Ulug‘ Vatan urushidagi G‘alabaning 80-yilligi kuni Moskvada o‘tkazishni taklif qildim”, — deb yozadi Olga Lyubimova o‘zining Telegram-kanalida.
Uning so‘zlariga ko‘ra, MDHning madaniyat sohasidagi aloqalari yildan yilga mustahkamlanib, Hamdo‘stlik mamlakatlari aholisiga qo‘shma loyihalar: ko‘rgazmalar, konsertlar, festivallar, gastrollarni yaratish imkoniyatini bermoqda.
“MDH ishtirokchilari o‘rtasidagi gumanitar hamkorlikning abadiy asosi bo‘lib qoladigan o‘ta muhim jihat umumiy tarixiy xotiradir. Va birinchi navbatda, bu xotira Ulug‘ Vatan urushi voqealari bilan bog‘liq. Kelgusi 2025-yilda hamdo‘stlik mamlakatlari madaniy tadbirlarining leytmotiviga aylangan xalqlarimizning Buyuk G‘alabasining 80-yilligi mavzusi ham shu”, — deya qayd etdi u.
Uning qayd etishicha, Rossiya madaniyat va san’at universitetlarida MDH davlatlaridan ikki mingdan ortiq iqtidorli yoshlar tahsil olmoqda.
MDHga a’zo davlatlar Madaniy hamkorlik kengashining navbatdagi yig‘ilishi 2025-yilning ikkinchi yarmida Tojikistonda bo‘lib o‘tishi rejalashtirilgan.