TOShKENT, 15 sen — Sputnik. O‘zbekiston qator sohalardagi loyihalarni amalga oshirishga turk kompaniyalarini jalb etadi. Bu haqda Investitsiyalar, sanoat va savdo vazirligida bo‘lib o‘tgan uchrashuvda ma’lum qilindi.
Investitsiyalar, sanoat va savdo vaziri o‘rinbosari Akram Aliyev BALQANSIAD uyushmasi raisi Fotih Sharif boshchiligidagi turk tadbirkorlari delegatsiyasi bilan uchrashuv o‘tkazdi.
Unda Turkiyaning 18 ta yetakchi kompaniyasi vakillari ham ishtirok etdi.
Qayd etilishicha, sog‘liqni saqlash, infratuzilmani rivojlantirish, metallurgiya, mashinasozlik kabi sohalardagi hamkorlik istiqbollari muhokama qilinib, loyihalarni birgalikda amalga oshirishga turk kompaniyalarini jalb etishga alohida e’tibor qaratildi.
“Suv tozalash inshootlarini qurish, avtomatik shisha eshiklar, stomatologik implantlar va mebel sanoati uchun uskunalar ishlab chiqarish loyihalarini ishlab chiqishga alohida e’tibor qaratildi”, — deyiladi xabarda.
Muzokaralar yakunlari bo‘yicha hamkorlikda ishlarni davom ettirish mexanizmlari ishlab chiqildi. Muhokama qilingan loyiha va tashabbuslarni amalda tatbiq qilish bosqichlari belgilab olindi.
Belgilangan rejalar O‘zbekiston va Turkiya o‘rtasidagi o‘zaro manfaatli hamkorlikni chuqurlashtirish va iqtisodiy aloqalarni mustahkamlash yo‘lidagi navbatdagi qadam bo‘lishiga o‘zaro ishonch bildirildi.