TOShKENT, 12 sen — Sputnik. Shu yil oktabr oyidan “Xotin-qizlar.uz” platformasi doirasida Xotin-qizlar muammolarini o‘rganish va tizimli hal etish moduli (Muammolarni o‘rganish moduli) ishga tushiriladi. Bu haqda hukumat tomonidan qabul qilingan tegishli qarorda nazarda tutilgan.
Mazkur modul orqali aniqlangan muammolar tegishliligi bo‘yicha “mahalla — tuman — viloyat — respublika” darajasida hal etilishi ta’minlanadi.
2024 yil 1-oktabrgacha modulga kiritilgan masalalarni, birinchi navbatda, mahalla va tuman (shahar) darajasida, zarur hollarda esa viloyat yoki respublika darajasida hal etish va monitoringini yuritishni nazarda tutuvchi mexanizm joriy qilinadi.
Shuningdek, modul orqali kelib tushgan murojaatlarni mas’ul vazirlik va idoralar hamda mahalliy ijro etuvchi hokimiyat organlari tomonidan o‘rganib chiqish va hal etishni ta’minlash maqsadida ular uchun foydalanuvchi kabinetlar tashkil etiladi.
"Birinchi oktabrdan doimiy ravishda Muammolarni o‘rganish moduli orqali kelib tushgan murojaatlar bilan ishlash, xotin-qizlarning muammolarini hal etish yuzasidan monitoring yuritiladi", — deyiladi hujjat matnida.
Eslatib o‘tamiz, o‘tgan yilning dekabr oyida prezident tomonidan qabul qilingan tegishli qarorga ko‘ra, 2024-yil 1-fevraldan “xotin-qizlar.uz” platformasi negizida “Band bo‘lmagan xotin-qizlar” moduli yaratilib, vazirlik va idoralarning axborot tizimlariga integratsiya qilinadi.