TOShKENT, 9 sen — Sputnik. Yerevanda 30-sentabrdan 1-oktabrgacha bo‘lib o‘tadigan III Yevroosiyo iqtisodiy forumining bu yilgi asosiy mavzusi “YeOII 10-yilligi: istiqbollar va ustuvorliklar” deb nomlandi. Bu haqda Yevroosiyo iqtisodiy komissiyasi (YeIK) matbuot xizmati xabar berdi.
Forum ishtirokchilari Ittifoqqa a’zo davlatlar o‘rtasidagi iqtisodiy hamkorlikning dolzarb yo‘nalishlari, jumladan, YeOIIni strategik rivojlantirish, har tomonlama va texnologik hamkorlik, raqamlashtirish, transport infratuzilmasi va logistikasini rivojlantirish, ichki bozor sifati va tadbirkorlikni qo‘llab-quvvatlash, shuningdek, xalqaro hamkorlik masalalarini muhokama etishadi.
Tadbirning biznes qismidagi sessiyalar mavzulari birgalikda e’tiborni talab qiladigan Yevroosiyo “beshligi” kun tartibidagi dolzarb masalalar yechimini topishga qaratiladi.
“Forum Yevroosiyo Hukumatlararo Kengashi yig‘ilishiga to‘g‘ri keladi va unda YeOII mamlakatlari hukumat rahbarlari va davlat organlari vakillari, uchinchi davlatlar hukumatlari a’zolari, yirik, o‘rta va kichik biznes rahbarlari, Ittifoq doirasida o‘zaro hamkorlikni rivojlantirishdan manfaatdor xalqaro tashkilotlar vakillari ishtirok etishi ko‘zda tutilgan”, — deyiladi xabarda.
Tadbir Armaniston Respublikasining 2024-yilda Yevroosiyo iqtisodiy ittifoqi organlariga raisligi doirasida o‘tkazilmoqda.
Ma’lumot uchun, Yevroosiyo iqtisodiy forumi Ittifoqning iqtisodiy sohadagi yillik biznes tadbiridir. U navbat bilan Ittifoq organlariga raislik qiluvchi YeOII davlatlaridan birida o‘tkaziladi.