TOShKENT, 3 sen — Sputnik. O‘zbekiston prezidentining topshirig‘iga muvofiq, mamlakat hukumati Rossiyaning Nijniy Novgorod viloyatida ro‘y bergan yo‘l-transport hodisasi oqibatida halok bo‘lgan fuqarolarning jasadini vatanga qaytarish bilan bog‘liq barcha tashkiliy masalalarni tezkorlik bilan hal etish bo‘yicha zarur choralarni ko‘rmoqda. Bu haqda O‘zbekistonning Rossiyadagi elchixonasi ma’lum qildi.
Elchixona xabariga ko‘ra, M-12 “Vostok” federal avtomagistralida sodir bo‘lgan YTHda sakkiz kishi halok bo‘lgan. Ulardan yetti nafari O‘zbekiston fuqarolari ekanligi aniqlangan. Qozon shahridagi Bosh konsulxonaning qo‘shimcha qilishicha, 1 nafar shaxsning O‘zbekiston fuqaroligiga mansubligi aniqlanmoqda.
3 nafar o‘zbekistonlik turli xil tan jarohatlari bilan tibbiyot muassasalarga joylashtirilgan.
Ushbu masala O‘zbekiston Vazirlar Mahkamasi va O‘zbekistonning Moskvadagi elchixonasi tomonidan alohida nazoratga olingan.
O‘zbekistonning Qozondagi Bosh konsulxonasi rahbariyati va Tashqi mehnat migratsiyasi agentligi vakolatxonasi xodimlari voqea joyida zarur yordam ko‘rsatmoqda.
Qo‘shimcha ma’lumot olish uchun O‘zbekistonning Moskvadagi elchixonasi Konsullik bo‘limining Call-markaziga murojaat qilish mumkin: +7 499 238-36-20; +7-499 230-00-76. O‘zbekistonning Qozon shahridagi Bosh konsulxonasi: +7 843 526-55-63.
Eslatamiz, avvalroq Rossiyaning Nijniy Novgorod viloyatida sodir bo‘lgan YTH O‘zbekiston va Tojikiston fuqarolari jabrlangani xabar qilingan edi.