TOShKENT, 29 avg — Sputnik. O‘zbekiston Oliy ta’lim, fan va innovatsiyalar vazirligi Rossiya tomoniga xavfsizlik maqsadida o‘zbekistonlik talabalarning Kursk viloyatidagi oliy o‘quv yurtlarida o‘qishini onlayn formatga o‘tkazishni taklif qilmoqda. Bu haqda RIA Novostiga vazirlik matbuot xizmati xabar berdi.
Samarqandda O‘zbekiston oliy ta’lim, fan va innovatsiyalar vaziri Kongratbay Sharipov va Rossiya Federatsiyasi Prezidentining xalqaro madaniy hamkorlik bo‘yicha maxsus vakili Mixail Shvidkoy ikki tomonlama hamkorlik masalalarini muhokama qildi.
“Sharipov Kursk viloyatidagi vaziyatni inobatga olib, o‘zbekistonlik talabalar xavfsizligini ta’minlash maqsadida ularning ta’limini onlayn formatga o‘tkazishni taklif qildi, shu bilan birga, O‘zbekiston tomoni bu borada Rossiya Federatsiyasi bilan hamkorlik qilishga tayyorligini bildirdi”, – dedi vazirlik vakili.
Tomonlar mamlakatlar o‘rtasida o‘qituvchilar va talabalar almashinuvi sohasidagi hamkorlikni rivojlantirish masalalarini ham muhokama qilishdi, deya qo‘shimcha qildi matbuot xizmati.
Rossiya tomoni ma’lumotlariga ko‘ra, bugungi kunda Rossiya Federatsiyasidagi oliy o‘quv yurtlarida tahsil olayotgan o‘zbekistonlik talabalar soni qariyb 60 ming nafarni tashkil etadi. Oxirgi uch yilda respublikadagi Rossiya oliy o‘quv yurtlarining filiallari soni 4 tadan 14 taga ko‘paydi, Toshkentda Rossiya xalqlar do‘stligi universitetining vakolatxonasi ham ochildi.