TOShKENT, 19 avg — Sputnik. Rossiya va Ozarbayjon prezidentlari Vladimir Putin va Ilhom Aliyevning tor doiradagi muzokaralari bo‘lib o‘tdi, deya xabar berdi Kreml sayti.
Rossiya rahbari ta’kidlaganidek, ikki davlat o‘rtasida hamkorlikda ishlash uchun energetika, sanoat kooperatsiyasi, transport, logistika, yengil sanoat kabi ko‘plab yo‘nalishlar mavjud.
Shu bilan birga, Putin hozirgi savdo aylanmasi hali ikki davlat imkoniyatlariga mos kelmasligiga ishora qildi.
“Siz Rossiyadagi avvalgi uchrashuvimizda to‘rt milliarddan sal ko‘proq yaxshi ko‘rsatkich, lekin bu bizning imkoniyatlarimiz salohiyatiga to‘g‘ri kelmaydi, degan edingiz”, — dedi u.
O‘z navbatida Aliyev Moskva va Boku energetika hamda transportdan tashqari, gumanitar va boshqa ko‘plab sohalarda ham hamkorlik qilishini ta’kidlab, Putinning kelishi ikki tomonlama munosabatlar uchun foydali bo‘lishiga ishonch bildirdi.
“Mohiyatan, biz kecha ish boshladik va ikki tomonlama kun tartibi va mintaqaviy xavfsizlikning muhim masalalari yuzasidan atroflicha fikr almashdik. Bugun biz tor formatda ham, kengaytirilgan formatda ham davom etamiz. Mamlakatlar o‘rtasidagi o‘zaro hamkorlik darajasidan juda mamnunman, biz 2022-yil fevral oyida imzolagan ittifoqchilik hamkorligi to‘g‘risidagi deklaratsiya muvaffaqiyatli amalga oshirilmoqda”, — dedi u.
Ozarbayjon va Armaniston o‘rtasidagi mojaro haqida gapirar ekan, Putin Rossiya ikki Kavkazorti respublikalari o‘rtasida tinchlik kelishuviga erishishda yordam berishga tayyorligini ta’kidladi.
“Agar biz tinchlik shartnomasini imzolash, masalani delimitatsiya, chegarani demarkatsiya qilish, logistika va iqtisodiyotdagi tegishli sohalarni blokdan chiqarish uchun nimadir qila olsak, biz bundan juda xursand bo‘lardik”, — dedi Putin.
Uning qo‘shimcha qilishicha, tashrifdan so‘ng Armaniston bosh vaziri Nikol Pashinyan bilan bog‘lanib, muzokaralar natijalari haqida gapirib beradi. Putin Ozarbayjonning mojaroni to‘liq hal etish bilan bog‘liq barcha jarayonlarni yakunlash niyatidan xabardor ekanini ta’kidladi.
Rossiya prezidentining so‘zlariga ko‘ra, Rossiya Boku bilan gumanitar aloqalarga katta ahamiyat beradi va rus tilining rivojlanishidan minnatdor.
“Gumanitar aloqalarga kelsak, biz sizning rus tilini rivojlantirishga qaratayotgan e’tiboringizga katta ahamiyat beramiz”, — dedi Putin.
Davlat rahbari Ozarbayjonda rus tilidagi 300 ta maktab, Rossiyaning eng yaxshi oliy o‘quv yurtlarining filiallari faoliyat yuritayotganini ta’kidladi. Bundan tashqari, minglab ozarbayjonlik talabalar Rossiya Federatsiyasining yetakchi universitetlarida tahsil olmoqda.
“Biz bu hamkorlikni kengaytirishga tayyormiz”, — dedi prezident.
Ma’lumot uchun, Rossiya yetakchisi Vladimir Putin kecha ikki kunlik davlat tashrifi bilan Bokuga keldi.