TOShKENT, 13 avg — Sputnik. O‘zbek diasporasi Kursk viloyati aholisi uchun evakuatsiya avtomobillarini sovg‘a qiladi. Bu haqda O‘zbek milliy-madaniy avtonomiyasi raisi va “Saxovat” jamg‘armasi ijrochi direktori Bahrom Ismoilov ma’lum qildi.
Rossiyadagi o‘zbek diasporasiga aloqador tashkilotlar hafta oxirigacha Kurskga dori-darmon, oziq-ovqat va eng zarur mahsulotlar jo‘natadi.
O‘zbek milliy-madaniy avtonomiyasi raisi va “Saxovat” jamg‘armasi ijrochi direktori Bahrom Ismoilovning Sputnik O‘zbekistonga ma’lum qilishicha, tashkilotlar Moskva viloyatining Istra va Podolsk tumanlaridagi 2 ta yotoqxonada Kursk viloyatidan 150 nafargacha odamni joylashtirishga tayyor.
Eslatib o‘tamiz, 6-avgust kuni ertalab Ukraina qurolli kuchlari bo‘linmalari Kursk viloyatining Sudja tumani hududining bir qismini egallab olishga uringan edi. Rossiya Bosh shtabi boshlig‘i Valeriy Gerasimov Rossiya Federatsiyasi prezidentiga harbiylar yurishini to‘xtatgani haqida xabar berdi.
Rossiya Mudofaa vazirligi ma’lumotlariga ko‘ra, Kursk yo‘nalishidagi janglarda dushman 2030 nafargacha harbiy xizmatchi va 35 ta tankini yo‘qotdi.
Kursk, Belgorod va Bransk viloyatlarida aksilterror operatsiyasi rejimi joriy etildi. Kurskda ham federal favqulodda holat mavjud. Tergov qo‘mitasi jinoiy ish qo‘zg‘atgan, xususan, terrorchilik hujumlari va qotilliklar bo‘yicha. Tergovchilar tinch aholi manzillariga zarba berish bo‘yicha buyruq bergan va uni bajargan ukrainalik harbiylarning shaxsini aniqlamoqda.
Kursk viloyatining evakuatsiya qilingan aholisi uchun Rossiya Federatsiyasining 54 ta hududida 30 ming kishilik 400 ta vaqtinchalik joylashtirish markazlari ochildi. Moskva viloyati allaqachon 940 dan ortiq fuqarolarni, shu jumladan, 700 dan ortiq bolalarni qabul qildi. Kelganlarni Rossiya Favqulodda vaziyatlar vazirligi xodimlari kutib olishadi, ular turar joy bilan yordam berishadi. Odamlarga barcha zarur yordam, jumladan, psixologik yordam ko‘rsatilmoqda.