TOShKENT, 27-iyul — Sputnik. 23-25 iyul kunlari Xanoy shahrida (Vyetnam) Yevroosiyo iqtisodiy ittifoqi va Vyetnam o‘rtasida savdodagi texnik to‘siqlar bilan bog‘liq bozorga kirish masalalari bo‘yicha navbatdagi muloqotning 1-yig‘ilishi bo‘lib o‘tdi. Bu haqda YeIK matbuot xizmati xabar berdi.
“Doimiy muloqot – bu Yevroosiyo iqtisodiy ittifoqi va Vyetnam ekspertlari do‘stona muhitda dolzarb masalalarni muhokama qilishlari va yechim topishlari mumkin bo‘lgan maydondir”, — dedi Yevroosiyo iqtisodiy komissiyasi Savdo siyosati departamenti Savdoni tartibga solishning maxsus masalalari bo‘limi boshlig‘i o‘rinbosari Natalya Taraskina.
Muzokaralarda Rossiya sanoat va savdo vazirligi, Belarus Respublikasi elchixonasi, Rossiya Federatsiyasining Vyetnamdagi savdo vakolatxonasi vakillari ishtirok etdi.
Muntazam muloqotning 1-yig‘ilishi YeOII mamlakatlaridagi ishlab chiqaruvchilarni tashvishga solayotgan avtomobil sanoati va farmatsevtika mahsulotlari uchun Vyetnam bozoriga kirish masalalari bo‘yicha turli idoralar bilan o‘tkazilgan ikkita sessiyadan iborat bo‘ldi.
“Bir-birining tartibga solish tizimlarini yaxshiroq tushunish keyingi hamkorlik yo‘nalishlarini aniqlashning to‘g‘ri yo‘lidir”, - dedi Vyetnam transport vazirligi huzuridagi vakolatli sertifikatlashtirish organi bosh direktori o‘rinbosari Fam Min Txan.
Yig‘ilish natijasida Vyetnamning muayan masalalar bo‘yicha tartibga solish tizimlarini tushunishni sezilarli darajada oshirish va YeOII mahsulotlarining Vyetnam bozoriga kirish shartlarini yaxshilash bo‘yicha mumkin bo‘lgan keyingi harakatlarni aniqlash mumkin bo‘ldi.