Ko‘rgazmada jadidchilik davriga mansub 73 nafar tolibi ilmlarning achchiq qismatlari haqida hikoya qilinadi. Ko‘rgazma har kuni soat 10:00 dan 22:00 gacha ochiq.
Ko‘rgazma uchun savdo markazida 1400 kv.metrdan ortiq maydonga ega alohida joy ajratilgan.
"Jadidlar. Turkistonga maktublar" ko‘rgazmasi keng jamoatchilik diqqat-e’tiborini Markaziy Osiyo tarixining muhim bobiga qaratishga qaratilgan.
Yangi multimedia ko‘rgazma loyihasi jadidlar haqidagi ma’lumotlarni zamonaviy texnologiyalar orqali yoshlar uchun yangi, tushunarli va qulay shaklda qabul qilishga yordam beradi.
Ko‘rgazmada bir nechta bo‘limlar mavjud.
Tashrif buyuruvchilarga moziyga g‘oyibona sayohat qilishdek betakror tajribani taqdim etuvchi uch tildagi tasviriy va ovoz qurilmalari taqdim etiladi.
Ko‘rgazmaning ssenografiyasi va ovozli hikoyasi jadidlar tarixi, ularning ma’rifat va milliy istiqlol yo‘lidagi orzu-umidlari mujassam multimedia proyeksiyalari orqali taqdim etilgan.
Ko‘rgazma ssenografiyasining o‘zi jadidchilik davri talabalari haqida hikoya qiluvchi beshta solnomaviy va mavzuga aloqador hududlarga bo‘lingan.
Ko‘rgazmada jadidlar davriga oid nodir arxiv materiallari: maktublar, maqolalar va fotosuratlar ham namoyish etiladi.
Ularning aksariyati ilk bor jamoatchilik e’tiboriga havola qilinmoqda.