TOShKENT, 14-iyul — Sputnik. O‘zbekiston va Vengriya tabiiy ofatlarga qarshi kurashish sohasida hamkorlik qiladi, deya xabar berdi "Dunyo" AA.
O‘zbekiston elchisi Oybek Shaxavdinov Vengriya Tabiiy ofatlarga qarshi kurash milliy boshqarmasi bosh direktori o‘rinbosari Kristian Erdeli bilan muzokara o‘tkazdi. Unda ikki davlat o‘rtasida tabiiy ofatlarga qarshi kurashish sohasidagi hamkorlikni yo‘lga qo‘yish muhokama qilindi.
Vengriya vakili O‘zbekiston tomoni bilan favqulodda vaziyatlarni boshqarish va tabiiy ofatlar oqibatlariga qarshi kurashish sohasida hamkorlikni yo‘lga qo‘yishdan manfaatdor ekanligini bildirdi.
“O‘zbekiston Favqulodda vaziyatlar vazirligi bilan bu borada tajriba almashish, o‘zaro tashriflar tashkil etish, shuningdek, aniq tadbirlarni o‘tkazish bo‘yicha hamkorlik shartnomasini imzolash bo‘yicha yaqin aloqalar o‘rnatish bo‘yicha kelishuvga erishildi”, — deyiladi xabarda.
Qayd etilishicha, mazkur kelishuvlar mamlakatlar o‘rtasida tabiiy ofatlar va favqulodda vaziyatlarga qarshi kurashish sohasida sheriklik aloqalarini kengaytirish uchun yangi imkoniyatlar ochadi.