TOShKENT, 7-iyul — Sputnik. Toshkentda 9-iyul kuni "O‘zbekiston – Qirg‘iziston: strategik sheriklik sinergiyasi" mavzusida ilmiy-amaliy konferensiya bo‘lib o‘tadi, deya xabar berdi "Dunyo" AA.
Anjumanda ikki mamlakatning yetakchi tahliliy markazlari va ilmiy-tadqiqot institutlari ekspertlari, vazirlik va idoralari, Toshkentda akkreditatsiyadan o‘tgan diplomatik korpus vakillari ishtirok etadi.
"Konferensiya ikki tomonlama, mintaqaviy va xalqaro darajadagi hamkorlikni yanada rivojlantirishning eng muhim masalalari bo‘yicha O‘zbekiston va Qirg‘izistonning umumiy yondashuvlarini ishlab chiqish hamda mustahkamlash, ikki tomonlama hamkorlikning aniq yo‘nalishlarini tahlil qilishga qaratilgan", — deyiladi xabarda.
Anjuman davomida ikki davlat rahbarlarining so‘nggi uchrashuvi chog‘ida imzolangan O‘zbekiston va Qirg‘iziston o‘rtasida har tomonlama strategik sheriklik to‘g‘risidagi tarixiy deklaratsiyaning mazmun-mohiyati va ahamiyatiga oid masalalar ko‘rib chiqiladi.
Tadbir Markaziy Osiyo xalqaro instituti va Qirg‘iziston prezidenti huzuridagi Milliy strategik tashabbuslar instituti tomonidan tashkil etilmoqda.