TOShKENT, 24-iyun — Sputnik. Ko‘ksaroy qarorgohida O‘zbekistonga davlat tashrifi bilan kelgan Mo‘g‘uliston prezidenti Uxnaagiyn Xurelsuxni rasmiy kutib olish marosimi bo‘lib o‘tdi, deya xabar berdi O‘zbekiston rahbari matbuot xizmati.
Qarorgoh oldidagi maydonda faxriy qorovul saf tortdi.
O‘zbekiston prezidenti Shavkat Mirziyoyev oliy martabali mehmonni samimiy kutib oldi va shohsupaga taklif qildi. Harbiy orkestr ikki mamlakat davlat madhiyalarini ijro etdi.
Yetakchilar faxriy qorovul safi oldidan o‘tib, rasmiy delegatsiyalar a’zolarini qutlashdi. Birgalikda suratga tushish marosimidan so‘ng oliy darajadagi muzokaralar boshlandi.
Eslatib o‘tamiz, O‘zbekiston prezidenti Shavkat Mirziyoyevning taklifiga binoan Mo‘g‘uliston prezidenti Uxnaagiyn Xurelsux 23-26 iyun kunlari davlat tashrifi bilan mamlakatda bo‘ladi. Tashrif davomida O‘zbekiston-Mo‘g‘uliston do‘stlik va ko‘p qirrali hamkorlik munosabatlarini yanada kengaytirish va mustahkamlash masalalari ko‘rib chiqiladi.