TOShKENT, 20-iyun — Sputnik. Xanoyda Rossiya va Vyetnam prezidentlari Vladimir Putin va To Lam o‘rtasidagi muzokaralar yakunlandi, deb xabar berdi RIA Novosti.
Yuqori darajadagi uchrashuv taxminan bir yarim soat davom etdi. Tomonlar imzolangan ikki tomonlama hujjatlar almashishdi, davlat rahbarlari ommaviy axborot vositalari uchun bayonotlar berishdi.
To Lam ta’kidlaganidek, muzokaralar muvaffaqiyatli kechdi, u va Putin hamkorlikning ko‘plab yo‘nalishlari, xalqaro va mintaqaviy masalalar yuzasidan ochiq fikr almashishdi.
Rossiya rahbari, o‘z navbatida, savdo va sarmoyaviy hamkorlikka katta e’tibor qaratilayotganini ta’kidladi.
“Tabiiyki, biz mintaqaviy kun tartibidagi qator masalalarni ko‘rib chiqdik, shuningdek, dolzarb xalqaro mavzularga ham to‘xtaldik. Rossiya va Vyetnamning ular bo‘yicha pozitsiyalari ko‘p jihatdan mos yoki yaqin ekanligini alohida ta’kidlab o‘taman”, — dedi Putin.
Rossiya davlat rahbarining qo‘shimcha qilishicha, Moskva va Xanoy birgalikda xalqaro huquq ustuvorligi, suverenitet, davlatlarning ichki ishlariga aralashmaslik tamoyillarini qat’iy himoya qiladi, asosiy xalqaro platformalarda sa’y-harakatlarni muvofiqlashtiradi.
Vyetnam prezidenti xalqaro muammolar haqida gapirar ekan, uning mamlakati xalqaro huquqqa asoslangan Osiyo-Tinch okeani mintaqasida teng va ajralmas xavfsizlik arxitekturasi tarafdori ekanini alohida ta’kidladi.
Shu bilan birga, u Rossiyani ustuvor sheriklardan biri deb biladi.
“Biz Rossiya bilan birgalikda mamlakatlarimiz rahbarlari tomonidan ko‘plab avlodlar tomonidan barpo etilgan an’anaviy do‘stona munosabatlarni rivojlantirishni istaymiz”, — dedi Vyetnam rahbari.
Uning qo‘shimcha qilishicha, Moskva va Xanoy bir-biriga qarshi qaratilgan ittifoqqa kirmaslikka kelishib olgan.
Putin, o‘z navbatida, samimiy qabul uchun minnatdorchilik bildirdi.
“Iliq deganda, men nafaqat tashqaridagi havo haroratini, balki Xanoy aholisi delegatsiyamizni ko‘chalarda qanday samimiy kutib olishini ham nazarda tutapman. Fursatdan foydalanib, ularga o‘zimning eng samimiy salomlarim va omonlik tilab qolaman”, — deya qo‘shimcha qildi Rossiya prezidenti.
U milliy valyutalarda hisob-kitoblarga izchil o‘tishni muhim deb atadi. O‘tgan yili bunday bitimlar ikki tomonlama tijorat bitimlari hajmining 40 foizdan ortig‘ini, joriy yilning birinchi choragida salkam 60 foizini tashkil etdi.
Rossiya Vyetnamning dolzarb xalqaro muammolar bo‘yicha muvozanatli pozitsiyasini yuqori baholaydi.
“Albatta, biz sizning eng keskin inqirozli vaziyatlarda muvozanatli pozitsiyangizni qadrlaymiz”, — dedi Putin.
Shuningdek, u Rossiya va Vyetnamning ko‘plab dolzarb xalqaro muammolar bo‘yicha pozitsiyalari o‘xshashligini aytdi.
“Biz xalqaro huquq, davlat suvereniteti va teng huquqlilik tamoyillariga asoslangan adolatli, demokratik, ko‘p qutbli dunyo tartibini barpo etish g‘oyalari bilan o‘rtoqlashamiz. Biz xalqaro birlashmalar, birinchi navbatda BMT doirasida yaqin va konstruktiv hamkorlik qilamiz”, — deya qo‘shimcha qildi u.
Ma’lumot uchun, Rossiya rahbari davlat tashrifi bilan kecha Pxenyandan Xanoyga keldi. Uchrashuv Vyetnam davlat rahbarining rasmiy qarorgohi – Xanoy shahridagi Prezident saroyida bo‘lib o‘tdi.