TOShKENT, 18-iyun — Sputnik. Rossiya prezidenti Vladimir Putin bugun kechqurun Shimoliy Koreyaga jo‘nab ketadi. Tashrif oldidan davlat rahbari “Rossiya va KXDR: yillar davomidagi do‘stlik va hamkorlik an’analari” mavzusida maqola chop etdi.
Materialda Moskva va Pxenyan o‘rtasidagi o‘zaro hamkorlik masalalari, AQShning o‘z siyosiy irodasini o‘tkazishga urinishi va neokolonial diktaturaga qarshilik ko‘rsatish zarurligi ta’kidlangan.
KXDR Rossiya maxsus harbiy operatsiyasini qo‘llab-quvvatlagani haqida.
Moskva Shimoliy Koreyaning Ukrainada maxsus harbiy operatsiyani qo‘llab-quvvatlashi, muhim xalqaro muammolar bo‘yicha birdamlik va BMTda umumiy qarashlarni himoya qilishga tayyorligini yuksak qadrlaydi.
Pxenyan — adolatli, suverenitetni o‘zaro hurmat qilish va bir-birining manfaatlarini hisobga olishga asoslangan ko‘p qutbli dunyo tartibini shakllantirishga yo‘l qo‘ymayotgan jamoaviy G‘arbning istagiga qat’iy qarshilik ko‘rsatishga tayyor, bizning ishonchli hamfikrimiz bo‘lgan va shunday bo‘lib qoladi ham, deyiladi maqolada.
AQShning neokolonial diktaturaga intilayotgani haqida.
Putinning ta’kidlashicha, Qo‘shma Shtatlar dunyoga qandaydir “qoidalarga asoslangan tartib” deb atalgan tartibni o‘rnatishga intilmoqda, bu esa mohiyatan ikki tomonlama standartlarga ega global neokolonial diktaturadir.
Bunday yondashuvga rozi bo‘lmagan va mustaqil siyosat yuritayotgan davlatlar tobora kuchayib borayotgan tashqi bosimlarga duch kelmoqda. AQSh rahbariyati mustaqil bo‘lishga bo‘lgan bunday tabiiy va qonuniy istakni — uning dunyodagi hukmronligiga tahdid deb biladi.
AQShning Rossiyani strategik mag‘lubiyatga uchratish niyati haqida.
Ular 2014-yilda Kiyevdagi Maydandagi voqealarni, keyin esa Donbassdagi urushni qo‘llab-quvvatlash va uyushtirish orqali o‘zlari qo‘zg‘atgan Ukrainadagi mojaroni cho‘zish uchun hamma narsani qilmoqdalar, deya ta’kidladi u.
Shu bilan birga, bu yillar davomida ular bizning vaziyatni tinch yo‘l bilan hal qilishga urinishlarimizni qayta-qayta rad etishdi. Rossiya barcha eng murakkab masalalar bo‘yicha teng huquqli muloqot uchun ochiq bo‘lgan va bo‘ladi.
Rossiyani izolyatsiya qilishga urinish.
Putinning ta’kidlashicha, dushmanlar Ukrainani qurol-yarog‘, pul va razvedka bilan ta’minlashda davom etmoqda va bu qurollardan Rossiya hududiga hujum uyushtirish uchun foydalanishga ruxsat bermoqda va rag‘batlantirmoqda.
Bundan tashqari, G‘arb doimiy ravishda yangi sanksiyalar bilan iqtisodni charchatib, mamlakat ichida ijtimoiy-siyosiy keskinlikni kuchaytirishga urinmoqda. Biroq ularning barcha urinishlari muvaffaqiyatsiz tugadi.
"Ammo ular qancha urinmasin, Rossiyani jilovlash va izolyatsiya qilishga urinishlari muvaffaqiyatsizlikka uchradi. Biz iqtisodiy salohiyatimizni ishonch bilan oshirishda, sanoat, texnologiya, infratuzilma, fan, ta’lim, madaniyatni rivojlantirishda davom etamiz", - deb yozadi Putin.
Uning ta’kidlashicha, KXDR "ko‘p yillik iqtisodiy bosim, provokatsiyalar, shantaj va AQShning harbiy tahdidlariga" qaramay, o‘z manfaatlarini xuddi shunday samarali himoya qilishda davom etmoqda.
Davlat rahbari, shuningdek, Kim Chen In boshchiligidagi Shimoliy Koreya rahbariyati barcha kelishmovchiliklarni tinch yo‘l bilan hal qilish istagini bir necha bor bildirganini, biroq Vashington avvalgi kelishuvlardan voz kechib, yangi, tobora keskinlashib borayotgan va shubhasiz, nomaqbul talablarni ilgari surayotganini eslatdi.
Moskva va Pxenyan muqobil hisob-kitob mexanizmlarini ishlab chiqadi.
Buning uchun biz G‘arb tomonidan nazorat qilinmaydigan savdo va o‘zaro hisob-kitoblarning muqobil mexanizmlarini ishlab chiqamiz va noqonuniy bir tomonlama cheklovlarga birgalikda qarshi turamiz. Va shu bilan birga - Yevroosiyoda teng va bo‘linmas xavfsizlik arxitekturasini quramiz.
Davlat rahbari Rossiya va Shimoliy Koreya o‘rtasidagi gumanitar hamkorlikni, jumladan, talabalar almashinuvi, madaniy-ma’rifiy dasturlar, turistik sayohatlarni rivojlantirishga va’da berdi.
U birgalikdagi sa’y-harakatlar bilan mamlakatlar o‘zaro munosabatlarni yanada yuqori bosqichga olib chiqish, suverenitetni mustahkamlash va savdo-iqtisodiy munosabatlarni rivojlantirishga hissa qo‘shishiga ishonch bildirdi.
Rossiya rahbari kelajakdagi xavfsizlik arxitekturasi uni shakllantirishda ishtirok etishga tayyor bo‘lgan barcha davlatlar uchun ochiq ekanligini ta’kidladi. Uning aytishicha, Yevropa mustaqil taraqqiyot markazlaridan biri bo‘lib qolishni istasa, Moskva bilan yaxshi munosabatda bo‘lishi kerak.