O‘zbekiston va Rossiya mehnat migrantlari bilan ishlashda yangi axborot siyosatiga muhtoj, deydi Moskvadagi O‘zbek milliy-madaniy muxtoriyati kengashi raisi Bahrom Ismoilov.
Sputnik O‘zbekiston matbuot markazida mehnat migratsiyasi masalalariga bag‘ishlangan “Toshkent-Moskva” videoko‘prigi bo‘lib o‘tdi. Unda O‘zbekistondan Rossiya Federatsiyasiga ishlash uchun ketayotganlar duch kelayotgan qiyinchiliklar haqida so‘z bordi.
“Muammolar ketish bosqichidan boshlanadi, ya’ni Rossiyaga ketayotgan migrantlar o‘rtasida axborot ishi yetishmaydi... Biz qabul qiluvchi tomon sifatida bunday holatlarga tez-tez duch kelamiz”, — dedi Ismoilov.
Uning tushuntirishicha, O‘zbekistondan Rossiya Federatsiyasiga kelayotgan mehnat migrantlari ko‘pincha Rossiyada bo‘lish tartibi va Rossiya qonunchiligi haqida ma’lumotga ega emaslar.
“O‘zbekiston viloyatlari aholisi ko‘pincha bu yerda qanday tahdidlar – yuqori texnologiyalar sohasidagi jinoyatlar, giyohvand moddalar savdosi va hokazolar bilan duch kelishi mumkinligini tushunmaydi”, — deya qo‘shimcha qildi Ismoilov.
Ekspertning fikricha, O‘zbekiston va Rossiya migratsiya masalalarini hal etishning yangi bosqichiga o‘tayotgani sababli “chiqish va qabul qiluvchi tomonda axborot siyosatida jiddiy o‘zgarishlar bo‘lishi kerak”.
“Oddiy qilib aytganda Rossiyadagi bo‘lajak ishchilar, mehnat migrantlariga 90 foiz hollarda muammolardan qochishga yordam beradigan eng muhim ma’lumotlarni yetkazishimiz mumkin bo‘lgan aeroportlar va vokzallarda efir vaqtini ajratishimiz kerak. Va bu oddiy muammolar bo‘lishi mumkin: ro‘yxatdan o‘tishdagi kechikish, o‘z vaqtida patent to‘lamaslik”, — dedi o‘zbek diasporasi vakili.
Tafsilotlar — Sputnik O‘zbekiston videosida.