TOShKENT, 10-iyun — Sputnik. O‘zbekiston korrupsiya xavfi yuqori bo‘lgan sohalarni o‘rganishni boshladi. Bu haqida Korrupsiyaga qarshi kurashish agentligi e’lon qilgan xabarda ma’lum qilindi.
Korrupsiyaga qarshi kurashish agentligi tomonidan korrupsiya xavf-xatarlari yuqori bo‘lgan sohalarda muayan muddatga mo‘ljallangan “Korrupsiyasiz soha ofisi” loyihalarini amalga oshirish ishlari boshlandi.
“Loyiha doirasida xalqaro tashkilotlar vakillari, soha ekspertlari va mutaxassislarini jalb etgan holda korrupsiya xavfi yuqori bo‘lgan sohalarni, korrupsiyaga imkon berayotgan holatlarni o‘rganish va xavflarni minimallashtirish choralarini ko‘rish nazarda tutilgan”, — deyiladi agentlik Telegram-kanalidagi xabarda.
Bu yil Agentlik tomonidan “Yuksalish” harakati, “Mintaqaviy muloqot” xalqaro tashkiloti bilan hamkorlikda “Korrupsiyasiz soha ofisi” loyihalari doirasida qator mavzularda tadqiqotlar o‘tkaziladi.
“Ipoteka krediti bo‘yicha davlat subsidiyalarini berishdagi nohalollik xavflarini baholash”;
“Maktabga qabul qilishda korrupsiya xavfi va nohalollik omillari mavzusida o‘tkazilgan tadqiqot natijalari bo‘yicha ishlab chiqilgan tavsiyalarni monitoring qilish”.
“Ushbu tadqiqotlarni o‘tkazish va amaliy chora-tadbirlarni ishlab chiqish maqsadida milliy va xalqaro ekspertlardan iborat Ishchi guruhlar tarkibi shakllantirildi”, — deyilgan xabarda.
Ishchi guruhlari tegishli ravishda Maktab va maktabgacha ta’lim, Raqamli texnologiyalari, Iqtisodiyot va moliya, Adliya, Sog‘liqni saqlash vazirliklari, Soliq qo‘mitasi, Kadastr agentligi, banklar va hokimliklar hamda boshqa mutaxassislarini qamrab olgan.