TOShKENT, 28-may — Sputnik. “Shimol-Janub” loyihasi doirasida Ozarbayjon, Eron, Turkmaniston, Qozog‘iston va O‘zbekistonni o‘z ichiga olgan uchta yo‘nalish ustuvor hisoblanadi. Bu haqda Rossiya Federatsiyasi prezidentining yordamchisi Igor Levitin aytdi.
“Bizda uchta yo‘nalish bor. Rossiya, Ozarbayjon, Eron – biz buni g‘arbiy yo‘nalish deymiz, Kaspiy – markaziy, sharqiy – bu Qozog‘iston, O‘zbekiston, Turkmaniston. Bu uch yo‘nalish umumiydir, biz ularni Shimol-Janub deb ataymiz, ular keyingi besh yil uchun ustuvor yo‘nalishlar sifatida ko‘riladi”, — deya javob berdi Levitin jurnalistlarning “Shimol-Janub” loyihasi doirasida qancha davlat ko‘rib chiqilayotgani haqidagi savoliga.
Xalqaro transport koridorining uchta yo‘nalishi mavjud: transkaspiy (temir yo‘llar va portlar yordamida), shuningdek, g‘arbiy va sharqiy (quruqlik).
Rossiya prezidenti O‘zbekistonga davlat tashrifi davomida respublikada temir yo‘l transporti va infratuzilmasini rivojlantirish bo‘yicha keng qamrovli hamkorlik dasturi, jumladan, Rossiya temir yo‘l texnikasini yetkazib berish va uni ishlab chiqarishni mahalliylashtirish rivojlanish bosqichida ekanligini aytdi.
“Shimol-Janub xalqaro koridorini yaratish bo‘yicha keng ko‘lamli loyiha bo‘yicha hamkorlik istiqbolli ko‘rinishi: Rossiya va Belarusdan Hind okeani qirg‘oqlarigacha bo‘lgan yo‘nalishlardan biri shu yerda, O‘zbekiston yonidan yoki O‘zbekiston hududi orqali o‘tadi. Bu qo‘shimcha imkoniyatlar yaratish, shu jumladan O‘zbekistonning okeanga chiqishi nuqtayi nazaridan juda qiziq bo‘lishi mumkin”, — dedi Putin.