TOShKENT, 26-may — Sputnik.O‘zbekiston prezidenti Shavkat Mirziyoyevning taklifi bilan O‘zbekistonga kelgan Rossiya yetakchisi Vladimir Putin “Yangi O‘zbekiston” bog‘iga tashrif buyurib, Mustaqillik monumenti poyiga gulchambar qo‘ydi.
Majmuani qisqa ko‘zdan kechirish davomida oliy martabali mehmonga ushbu me’moriy ansambl mazmuni va o‘ziga xos jihatlari haqida ma’lumot berildi.
Eslatib o‘tamiz, Rossiya prezidenti Vladimir Putin 26-27 may kunlari O‘zbekistonga davlat tashrifi bilan keldi.
Tashrif dasturi kun tartibida O‘zbekiston va Rossiya o‘rtasidagi keng qamrovli strategik sheriklik va ittifoqchilik munosabatlarini yanada rivojlantirish va chuqurlashtirish masalalari bo‘yicha oliy darajadagi muzokaralar o‘tkazish joy olgan.
Muzokaralarda, amaliy hamkorlikni kengaytirish, o‘zaro tovar ayirboshlash hajmini oshirish, iqtisodiy kooperatsiya loyihalarini ilgari surish, madaniy-gumanitar almashuvni davom ettirishga alohida e’tibor qaratiladi.
Sammit yakunlari bo‘yicha ikki tomonlama hujjatlar to‘plamini qabul qilish rejalashtirilgan.
Prezidentlar O‘zbekiston va Rossiya hududlari kengashining birinchi yig‘ilishida ishtirok etishadi.