TOShKENT, 20-may — Sputnik. Rossiya Federatsiyasi tashqi ishlar vaziri Sergey Lavrov Rossiya Eron TIV rahbariyatiga mamlakat prezidenti Ibrohim Raisiy, Eron TIV rahbari Husayn Amir Abdullohiyon va ularga hamroh bo‘lganlarning fojiali vafoti munosabati bilan hamdardlik bildirdi.
Qayd etilishicha, Moskva ularni ikki tomonlama hamkorlikni rivojlantirishga ulkan hissa qo‘shgan do‘stlari sifatida doimo eslaydi.
“Biz bu buyuk siyosiy arboblarni o‘z davlati manfaatlarini qat’iy himoya qilgan, Vatanga fidokorona xizmat qilishga jon fido qilgan Islom Respublikasining haqiqiy vatanparvarlari sifatida hamisha eslaymiz. Rossiyada Eron prezidenti Ibrohim Raisiy va Eron tashqi ishlar vaziri Husayn Amir Abdullohiyon mamlakatimizning haqiqiy, ishonchli do‘stlari sifatida tanilgan edi. O‘zaro manfaatli Rossiya-Eron hamkorligi va ishonchli sheriklikni mustahkamlashda ularning roli beqiyos”, — deyiladi bayonotda.
Rossiya tashqi ishlar vazirining ta’kidlashicha, Moskva “vertolot halokatida Raisiy va Eron tashqi ishlar vazirligi rahbarining fojiali halok bo‘lgani haqidagi xabardan chuqur qayg‘uda”.
“Biz halok bo‘lganlarning oila a’zolari va yaqinlariga, shuningdek, barcha do‘st Eron xalqiga chuqur hamdardlik bildiramiz, bu qayg‘uli vaqtda bizning fikrimiz va qalbimiz siz bilan”, — deya yakunladi Lavrov.