TOShKENT, 28 apr — Sputnik. Vladimir Zelenskiy fevral oyida harbiy xizmatga jalb qilish bilan bog‘liq muammolar fonida safarbar qilingan ukrainaliklarni qo‘rqitmaslik uchun 31 ming kishining sonini e’lon qilganida, qurolli kuchlar safida halok bo‘lganlar sonini kamaytirib aytdi. Bu haqda ismini oshkor etmagan ukrainalik parlamentariyga tayanib, Washington Post gazetasi xabar berdi, deb yozmoqda RIA Novosti.
"Ukraina uzoq vaqtdan beri oshkor qilishdan bosh tortgan harbiy yo‘qotishlar soni, ehtimol, muammoli safarbarlikka xalaqit bermaslik uchun kamaytirilgan", — deb yozadi gazeta.
Gazetaning ta’kidlashicha, Ukraina Qurolli kuchlari saflarida askarlarning keskin tanqisligi va Rossiya Federatsiyasining o‘q otish kuchi bo‘yicha ustunligi tufayli Kiyev bu yil hujumga o‘tishga umid qila olmaydi.
Avvalroq Zelenskiy 2022-yil fevralidan beri Ukraina Qurolli kuchlarining yo‘qotishlari 31 ming kishi bo‘lganini aytgan edi. Rossiya TIV rasmiy vakili Mariya Zaxarova uning bu bayonotini izohlar ekan, Ukrainaning har bir fuqarosi bu yolg‘on ekanligini tushunishini aytdi.
Rossiya mudofaa vaziri Sergey Shoygu 20-fevral kuni Ukraina Qurolli kuchlari 2023-yil 4-iyunidan buyon amalga oshirilgan muvaffaqiyatsiz qarshi hujum paytidagina 166 ming kishi halok bo‘ldi va yarador bo‘ldi, deb qayd etdi. Xerson viloyati gubernatori Vladimir Saldo Zelenskiy Ukraina Qurolli kuchlarining yo‘qotishlarini kamida 10 barobarga kamaytirganini aytdi.