TOShKENT, 3 apr — Sputnik. Bugun, 3-aprel kuni Xalq deputatlari Toshkent shahar kengashining navbatdan tashqari sessiyasi bo‘lib o‘tdi. Unda O‘zbekiston prezidenti Shavkat Mirziyoyev ishtirok etdi, deya xabar berdi prezident matbuot xizmati.
Davlat rahbari so‘zining avvalida poytaxt jamoatchiligi bilan ko‘rishib turganidan mamnunligini ta’kidlab, bugungi kundagi dolzarb masalalarga to‘xtaldi. Dunyodagi, jumladan, hamkor davlatlardagi vaziyatning iqtisodiyotga, aholi daromadlariga salbiy ta’sirini kamaytirish eng muhim vazifalardan ekani ta’kidlandi.
Prezident Respubliki Uzbekistan Shavkat Mirziyoyev
© Press-slujba prezidenta Uzbekistana
“Har qanday bino tashqi ta’sirlarga bardosh berishi uchun uning poydevori mustahkam bo‘lishi shart. Mamlakatimiz poydevori, bu – mahalla. Mahallaning iqtisodiy zamini mustahkam bo‘lsa, odamlar daromadi ko‘payib, yaxshi yashashga uyi, bolasini o‘qitishga sharoiti bo‘lsa, ertangi kuni uchun xotirjam bo‘lsa, shunda barqarorlik, taraqqiyot bo‘ladi”, – dedi Shavkat Mirziyoyev.
Shu nuqtayi nazardan, mutasaddilar faoliyatidagi sustkashliklar, tumanlarda ishga solinmayotgan imkoniyatlar ko‘rsatib o‘tildi.
Ta’kidlanishicha, Toshkent shahrida loyiha qilish istagidagi investor va tadbirkorlar ko‘p. Lekin buning uchun yer kam. Foydalanilmayotgan joylarni davlat ro‘yxatidan o‘tkazish, 979 ta yer uchastkasini auksionga chiqarish, qishloq xo‘jaligidan sanoat va aholi punkti toifasiga o‘tgan 175 gektarlik yerni berish orqali ularga sharoit yaratish mumkin.
Qayd etilishicha, iqtisodiy faol aholidan 80 mingi ishga muhtoj. Shu bilan birga, poytaxtdagi korxona va tashkilotlarda 98 ming bo‘sh ish o‘rni mavjud.
Sessiyada tashkiliy masala ham ko‘rildi. Davlat rahbari Toshkent shahri hokimi vazifasini bajarib kelayotgan Shavkat Umurzoqov nomzodini poytaxt hokimi lavozimiga tavsiya etdi. Xalq deputatlari, jamoatchilik vakillari so‘zga chiqib, nomzod haqida fikrlarini bildirdi. Ovozga qo‘yish natijalariga ko‘ra, Shavkat Umurzoqov Toshkent shahri hokimi etib tasdiqlandi.
Prezident Toshkentda natija qilish uchun imkoniyat ham, resurs ham, sharoit ham yetarli ekani, buning uchun shahar va tuman hokimlari, iqtisodiy kompleks vakillari uyg‘onib, katta marralar olib, qattiq ishlashi kerakligini ta’kidladi.
Prezident Respubliki Uzbekistan Shavkat Mirziyoyev
© Press-slujba prezidenta Uzbekistana
Yig‘ilishda shaharni iqtisodiy-ijtimoiy rivojlantirish imkoniyatlari Yunusobod tumani misolida tahlil qilindi.
Ta’kidlanishicha, so‘nggi yetti yilda tumanga 1 milliard 700 million dollar xorijiy investitsiya kiritilib, korxona, savdo va xizmat ko‘rsatish obyektlari 3,5 mingtaga, ish o‘rinlari 20 mingtaga ko‘paydi. 6 ming xonadonli yangi uy-joylar qurildi, 8 mingta yangi o‘quvchi o‘rni tashkil qilindi, 3 ta oliygoh ochildi.
Yunusobod hududi bo‘yicha Toshkent shahrida birinchi, aholi soni bo‘yicha esa ikkinchi o‘rinda turadi. Tumanda 64 ta mahalla bo‘lib, 376 ming aholi istiqomat qiladi. Hudud soliq tushumlari hajmi bo‘yicha yetakchi. Lekin aholi jon boshiga hisoblaganda yuqori emas. Tumanning poytaxt sanoatidagi ulushi eng oxirgi o‘rinda. Shulardan kelib chiqib, aholi daromadlarini oshirish bo‘yicha ishga solinmagan imkoniyatlar ko‘rsatib o‘tildi.
Endi banklarga odamlar daromadini ko‘paytirish, tuman iqtisodiyotini barqaror o‘stirish bo‘yicha yangi mas’uliyat belgilanadi. Ish o‘rni yaratgan mijozlarga kredit foizi tushirib boriladi. Hokim yordamchilari esa ishsizlarni tadbirkorlar talabi asosida o‘qitadi. Mutasaddilarga bu borada “Yunusobod tajribasi”ni yo‘lga qo‘yish bo‘yicha ko‘rsatmalar berildi.
Prezident Respubliki Uzbekistan Shavkat Mirziyoyev
© Press-slujba prezidenta Uzbekistana
Umuman, o‘rganishlar asosida Yunusobodda 600 million dollar investitsiya, 35 mingta yuqori daromadli ish o‘rni imkoniyatlari aniqlangan.
Hukumatga barcha tumanlarni shu tarzda o‘rganib, Toshkent shahrida 250 ming yuqori daromadli ish o‘rni yaratish, 2 milliard dollar sarmoya jalb etish choralarini ko‘rish topshirildi. Sanoat, infratuzilma, tadbirkorlik va kommunal sohalarda ilg‘or xorijiy tajribani joriy etish vazifasi qo‘yildi.
Mahallalardagi obodlik masalasiga ham alohida e’tibor qaratildi. Mahalla raislari va nuroniylar milliy qadriyatlarni tiklab, ko‘cha bo‘ylari va hovlilarda gulu rayhonlar ekish, daraxt o‘stirish, ishkomlar qilish, ozodalik ishlariga bosh-qosh bo‘lishi zarurligi aytildi.
Davlat rahbari bu boradagi faollikni rag‘batlantirish maqsadida tanlov o‘tkazib, yil yakuni bilan eng namunali mahallaga elektromobil sovg‘a qilish taklifini bildirdi. Bu taklif olqishlar bilan qo‘llab-quvvatlandi.
Yig‘ilish so‘ngida prezident xalq deputatlari, mahalla raislari, ziyolilar va yoshlar bilan muloqot qildi.