TOShKENT, 14 mar — Sputnik. Rossiyaning g‘alabasi aniq, shuning uchun G‘arb Ukrainadan qanday qutulish haqida o‘ylamoqda. Bu haqda Amerikaning sobiq razvedka xodimi Skott Ritter “Dialogue Works” YouTube-kanalida ma’lum qildi, deb yozmoqda RIA Novosti.
"Ukraina – biz Rossiyaga zarar yetkazish uchun ishlatgan vosita. Bu vosita eskirdi va samarasiz bo‘lib qoldi", – dedi u.
Ritterning qo‘shimcha qilishicha, hozir Kiyevning foydasi yo‘q, undan qutulish vaqti keldi.
"Biz ularning (Ukrainaning – tahr.) g‘alaba qozonishini hech qachon istamaganmiz. Biz ularning g‘alaba qozonishini kutmaganmiz. Biz faqat ular Rossiyaga zarar keltirishlarini xohlagan edik", – deb tushuntirdi ekspert.
Razvedka xodimi fikriga ko‘ra, Kiyev allaqachon mag‘lub bo‘lgan. G‘arb hozir Ukrainani qo‘llab-quvvatlayotgandek ko‘rinmoqda, lekin aslida uning asta-sekin o‘lishiga imkon berapti, deb xulosa qildi Ritter.
Avvalroq Markaziy razvedka boshqarmasi direktori Robert Berns AQShning qo‘shimcha harbiy yordamisiz Ukraina bir yil ichida Moskva shartlariga ko‘ra Rossiya bilan tinchlik muzokaralariga kirishishga majbur bo‘lishini aytgan edi. Bernsning so‘zlariga ko‘ra, yangi harbiy yordamning yo‘qligi Ukraina Qurolli kuchlarining yanada faolroq chekinishiga va bu yil Ukraina qo‘shinlari bosib olingan aholi punktlarini yo‘qotishiga olib keladi.
Bundan tashqari, Markaziy razvedka boshqarmasi rahbari ta’kidlaganidek, Ukrainaning mag‘lubiyati oqibatlari AQShning nafaqat Yevropadagi, balki Hindiston-Tinch okeani mintaqasidagi manfaatlariga ham ta’sir qiladi.
Seshanba kuni Vengriya tashqi ishlar vaziri Peter Siyarto Kiyev Moskva bilan qarama-qarshilikda g‘alaba qozona olmasligini aytdi.