TOShKENT, 9 mar — Sputnik. Yevroosiyo iqtisodiy komissiyasi (YeIK) umumiy energiya bozorlarini tartibga soluvchi hujjatlar ustida ishlashni davom ettirmoqda, deb xabar bermoqda komissiya matbuot xizmati.
Neft va gaz bo‘yicha maslahat qo‘mitasining 20-yig‘ilishi ishtirokchilari YeOII gaz, neft va neft mahsulotlarining umumiy bozorlarini shakllantirish uchun zarur bo‘lgan hujjatlarni tayyorlash haqida gaplashishdi. U Yevroosiyo iqtisodiy komissiyasi energetika departamenti direktori Vadim Zakrevskiy raisligida o‘tkazildi.
Zakrevskiy umumiy energetika bozorlarini tartibga soluvchi hujjatlar to‘plami ustida ish olib borishni tez orada yakunlash ustuvorligi yuqori ekanligini ta’kidladi.
“Masalaning strategik ahamiyatini inobatga olgan holda, davlatlarimiz rahbarlari tomonidan qabul qilingan qarorlarning o‘z vaqtida bajarilishini ta’minlash va 2025-yilgacha energetika integratsiyasi bo‘yicha belgilangan maqsadlarga erishish bo‘yicha sa’y-harakatlarimizni muvofiqlashtirish zarur”, - dedi Zakrevskiy.
Uchrashuvda ushbu yo‘nalishdagi mavjud kelishmovchiliklar hamda energetika xavfsizligi masalalari yuzasidan konstruktiv fikr almashildi.
Yig‘ilish ishtirokchilari yondashuvlarni yaqinlashtirish muhimligini va tezkor qarorlarni yuqori darajada qabul qilish zarurligini ta’kidladilar.
Tomonlar energetika sohasidagi vakolatli organlar rahbarlari darajasida maslahatlashuvlarni keyinchalik Ittifoq organlari tomonidan ko‘rib chiqilishi bilan davom ettirishga kelishib oldilar.