TOShKENT, 29 fev — Sputnik. Yevroosiyo iqtisodiy ittifoqiga (YeOII) a’zo davlatlarning savdo-sanoat palatalari vakillari birlashmada kooperatsiyani moliyalashtirish mexanizmini ishga tushirishni rejalashtirmoqda, deb xabar berdi Rossiya Savdo-sanoat palatasi.
YeOIIda sanoat kooperatsiyasini qo‘llab-quvvatlash bo‘yicha navbatdagi yig‘ilishda har bir palata tomonidan amalga oshirilishi lozim bo‘lgan aniq qadamlar muhokama qilindi. Bunda loyiha idorasi va yangi qo‘llab-quvvatlash mexanizmida ishtirok etuvchi moliya tashkilotlari o‘rtasida muloqot o‘rnatish maqsad qilingan.
“Loyiha idorasi a’zolari YeOII korxonalarining hamkorlik loyihalari bilan ishlash holatini yangilashdi va uning faoliyati natijalarini axborot bilan targ‘ib qilish bo‘yicha takliflarni ko‘rib chiqishdi”, — deyiladi xabarda.
Ayni paytda qo‘shma hamkorlik loyihalarini ko‘rib chiqish uchun ekspert guruhi tuzilmoqda. Shu munosabat bilan Rossiya Savdo-sanoat palatasi moliya-sanoat va investitsiya siyosati bo‘yicha kengashi raisi Vladimir Gamza uning tuzilmasi va ish tartibi bo‘yicha takliflarini taqdim etdi.
Loyiha ofisining navbatdagi yig‘ilishi YeOIIga a’zo mamlakatlardan birida joyida o‘tkazilishi rejalashtirilgan.