“So‘nggi paytlarda YeOII va O‘zbekiston tuzilmalari o‘rtasida ishchi guruh faoliyat yuritmoqda. U, O‘zbekistondagi mavjud vaziyatni hisobga olgan holda, tashkilotga to‘liq a’zo bo‘lish uchun qonuniy islohotlar loyihalari va boshqa jarayonlarni ishlab chiqmoqda. O‘ylaymanki, yaqin kelajakda bu masala ham tezlashadi”, — dedi elchi “Rossiya 24” telekanalida Toshkentning YeOII faoliyatiga qo‘shgan hissasini qayd etib.
Yevroosiyo iqtisodiy ittifoqi (YeOII) 2014-yilda Rossiya, Belarus va Qozog‘iston o‘rtasida tuzilgan shartnoma asosida tashkil etilgan xalqaro tashkilotdir. Bu ittifoqqa 2015-yilda Armaniston va Qirg‘iziston a’zo bo‘lgan, Moldova va Kuba kuzatuvchi maqomiga ega. O‘zbekiston 2020-yil dekabr oyida YeOIIda kuzatuvchi davlat maqomini olgan.
YeOIIning maqsadi — a’zo davlatlar aholisining turmush darajasini yuksaltirish borasida barqaror rivojlanish uchun sharoitlar yaratish, tovarlar, xizmatlar, kapital va ish resurslarining yagona bozorini shakllantirishga harakat qilish, global iqtisodiyot sharoitida milliy iqtisodiyotlarning raqobatbardoshligini oshirish, har tomonlama modernizatsiyalash va o‘zaro kooperatsiyani rivojlantirishdan iborat.