TOShKENT, 24 yanv – Sputnik. Donald Tramp Nyu-Gempshir shtatida AQSh prezidentligiga nomzodlarning birlamchi saylovlarida (praymeriz) g‘alaba qozonganini ma’lum qildi, deb yozmoqda RIA Novosti.
“Biz Nyu-Gempshirda uch marta g‘alaba qozondik”, — dedi u ovoz berishdan keyin tarafdorlari oldida qilgan chiqishida.
Tramp avvalroq bu shtatdagi praymerizda ikki marta g‘alaba qozongan – 2016-yilda endi prezidentlikka nomzod bo‘layotganida, shuningdek, 2020-yilda qayta saylanish kampaniyasi doirasida.
Sobiq prezident bu g‘alabani eng muhim deb atadi va noyabr oyida prezidentlikka saylanishiga ishonch bildirdi.
Seshanba kuni AQShning Nyu-Gempshir shtatida 2024-yilgi prezidentlikka nomzodlik uchun birlamchi saylovlar bo‘lib o‘tdi. Ovoz berish sobiq prezident Donald Trampning respublikachi asosiy raqiblari va BMTdagi sobiq doimiy vakili Nikki Xeyli o‘rtasidagi keskin raqobat muhitida o‘tdi.
“Associated Press” nashri prognoziga ko‘ra, Tramp – 53,8 foiz, Xeyli esa 10 foiz kam ovoz to‘plamoqda. Xeyli hali ovozlar sanalayotgan bosqichida mag‘lubiyatini tan oldi va raqibini g‘alaba bilan tabrikladi, biroq saylovda qatnashishni davom ettirish niyatini bildirdi.
Mamlakatning amaldagi rahbari Jo Bayden fevral oyi boshida Janubiy Karolinada ovoz berish uchun bu shtatdagi Demokratik partiyaning praymerizini o‘tkazib yuborishi haqida munozarali qaror qabul qildi.
Eslatib o‘tamiz, AQShda navbatdagi prezidentlik saylovlari 2024-yil noyabrida bo‘lib o‘tadi. Respublikachilar partiyasidan nomzodlikka Donald Tramp va Nikki Xeyli da’vogarlik qilmoqda. AQShning sobiq vitse-prezidenti Mayk Pens, Shimoliy Dakota gubernatori Dug Bergum, Janubiy Karolina shtati senatori Tim Skott va Nyu-Jersi shtati sobiq gubernatori Kris Kristi, shuningdek, Florida gubernatori Ron Desantis va tadbirkor Vivek Ramasvami allaqachon saylovoldi poygasidan chiqib ketishgan. Amerikaning amaldagi yetakchisi Jo Bayden Demokratik partiyadan qayta saylanish niyatida.