TOShKENT, 16 yanv — Sputnik. O‘zbekiston va Rossiya dori vositalari uchun GMP sertifikatlarini o‘zaro tan olish ustida ishlamoqda. Bu haqda AOKAda o‘tkazilgan brifingda Farmatsevtika tarmog‘ini rivojlantirish agentligi axborot xizmati rahbari Sevara To‘laganova ma’lum qildi.
Qayd etilishicha, O‘zbekiston hamda Rossiya vakolatli organlari tomonidan taqdim etilgan GMP sertifikatlarini o‘zaro tan olinishini yo‘lga qo‘yish borasida bir qator ishlar amalga oshirilmoqda.
“Farmatsevtika tarmog‘ini rivojlantirish agentligi hamda Rossiya Federatsiyasi Sanoat va savdo vazirligi Farmatsevtika va tibbiyot sanoatini rivojlantirish departamenti o‘rtasida “Rossiya Federatsiyasi va O‘zbekiston Respublikasida zarur ishlab chiqarish amaliyoti sohasidagi normativ-huquqiy tartibga solishni baholash va uyg‘unlashtirish bo‘yicha” yo‘l xaritasi tuzildi va ushbu masalada faoliyat olib boruvchi ishchi guruh tashkil etildi”, — dedi Sevara To‘laganova.
Bunda mahalliy ishlab chiqaruvchilar tomonidan ishlab chiqarilgan dori vositalarini Rossiyada Davlat ro‘yxatidan o‘tkazish jarayonini yengillashtirish va bu orqali eksport hajmini oshirish maqsad qilingan.
Qo‘shimcha qilinishicha, Rossiya GMP yo‘nalishidagi inspektorlarini farmatsevtik inspeksiya o‘tkazishdagi yondashuvlarini baholash maqsadida o‘tgan yilning noyabr oyida O‘zbekistondagi "RADIKS" MChJ ishlab chiqarish korxonasida hamkorlikda farmatsevtik inspeksiya o‘tkazildi.
Shuningdek, Moskva viloyatida joylashgan, insulin dori vositasini ishlab chiqarish bo‘yicha eng yirik korxonalar qatorida bo‘lgan "Gerofarm" korxonasida Markaz xodimlari tomonidan ishchi guruh qo‘shma inspeksiya bo‘lib o‘tdi.
Agentligning Zarur amaliyotlar markaziga 2023-yil davomida farmatsevtik inspeksiyalar o‘tkazish yuzasidan jami 752 ta ariza kelib tushgan. Ular asosida 19 ta mahalliy korxona va 35 ta xorijiy korxonada GMP yuzasidan, 153 ta mahalliy distributorda GDP yuzasidan hamda 1 ta hususiy bojxona omborhonasida GSP yuzasidan va 4 ta dorixonada GPP farmatsevtik inspeksiya o‘tkazilgan.
Ma’lumot uchun, GMP (good manufacturing practice) — dori vositalari ishlab chiqarishni tashkil etish va sifatini nazorat qilish talablarini belgilaydigan amaliyot.