TOShKENT, 19 dek — Sputnik. NATO harbiy xizmatchilari Ukraina havo hujumidan mudofaa tizimlarini, operativ-taktik raketalarni va bir nechta raketa tizimlarini bevosita nazorat qilmoqda. Bu haqda Rossiya mudofaa vaziri Sergey Shoygu Mudofaa vazirligi boshqaruvining kengaytirilgan yig‘ilishida ma’lum qildi.
"Ushbu vositalar yordamida zarbalar tayyorlashda biz radio to‘lqinlarida Amerika, Polsha va Britaniya nutqlarini qayd etmoqdamiz. NATO zobitlari o‘z mamlakatlarida ham, Ukrainada ham harbiy amaliyotlarga tayyorgarlik ko‘rishadi va Ukraina Qurolli kuchlari shaxsiy tarkibini o‘qitishadi”, — dedi Shoygu.
Uning so‘zlariga ko‘ra, Ukrainada to‘qqizta safarbarlik to‘lqini amalga oshirildi, hozirda o‘ninchisi davom etmoqda, harbiy xizmatga yaroqsizlar chaqirilmoqda.
Mudofaa vaziri qayd etishicha, Rossiya qo‘shinlari 2024-yilda NATOning Sharqqa yanada kengayish xavfini hisobga olgan holda jangovar tayyorgarlikdan o‘tadi.
Yig‘ilishda Mudofaa vazirligi rahbari “Sarmat” raketa tizimini jangovar navbatchilikka joylashtirish bo‘yicha ishlarni yakunlash, shuningdek, “Kinjal” va “Sirkon” gipertovushli raketalarini ishlab chiqarish hajmini oshirish bo‘yicha topshiriq berdi.
Qayd etilishicha, Rossiya harbiy guruhlari 1700 dan ortiq uchuvchisiz uchish apparati ekipaji va 1500 dan ortiq FPV-dron operatorlarini o‘qitdi. Zamonaviy rus uskunalari maxsus operatsiya sharoitida qattiq sinovdan o‘tdi va NATO davlatlarining shunga o‘xshash modellaridan ustunligini ko‘rsatdi. FPV-dronlari, individual elektron urush uskunalari va yangi aviatsiya qurollaridan foydalanish bo‘yicha o‘quv maydonchalari va markazlari yaratildi.
Uning so‘zlariga ko‘ra, jangovar mashg‘ulotlarga bo‘linmalarning yangi, "nostandart" taktik usullari joriy etilgan bo‘lib, ular jang maydonida o‘z samaradorligini ko‘rsatgan. Quruqlikdagi qo‘shinlarga 1,5 mingdan ortiq yangi va modernizatsiya qilingan tanklar, 2,5 mingdan ortiq piyoda jangovar texnika va bronetransportorlar yetkazib berildi.